Gardameer

in Wikipedia, die vrye ensiklopedie
Gardameer

Satellietbeeld van die Gardameer

Ligging van die Gardameer
Koördinate:45°38′N 10°40′O / 45.633°N 10.667°O / 45.633; 10.667Koördinate: 45°38′N 10°40′O / 45.633°N 10.667°O / 45.633; 10.667
Ligging:Noord-Italië:
Trentino-Suid-Tirol (noorde)
Lombardye (weste)
Veneto (ooste)
Soort:Binnemeer
Oppervlakte:369,98 km²
Gemiddelde diepte:136 m
Maksimum diepte:346 m
Volume:50,35 km³
Lengte:51,6 km
Breedte:16,7 km
Opvangsgebied:2 350 km²
Omtrek:158,4 km
Invloei:Sarca
Uitvloei:Mincio
Die Gardameer naby Torbole op 'n winternamiddag
Riva del Garda
'n Panoramiese uitsig oor Tremosine sul Garda
Malcesine, 'n nedersetting aan die Venetiese oosoewer (provinsie Verona). Landskapstonele soos hierdie word dikwels as 'n sintese tussen die noorde en suide beskryf
Die Gardameer in die Januarieson
Laaste strale van die Januarieson oor die Gardameer, soos gesien vanuit die Panganella-massief

Die Gardameer (Italiaans Lago di Garda) is die grootste meer in Italië met 'n oppervlakte van 369,98 vierkante kilometer. Die meer is tussen die Italiaanse Alpe in die noorde en die uitgestrekte Poriviervlakte in die suide geleë.

Die meer en sy oewerlyn maak deel uit van die Italiaanse provinsies Verona in die suidooste, Brescia in die suidweste en Trentino in die noorde. Die meer is tydens die laaste ystydperk deur die water van smeltende gletsers gevorm. Vandag is dit 'n belangrike toeristebestemming met 'n hoogs ontwikkelde infrastruktuur van vakansieoorde en hotelle langs sy oewers.

In 268 het 'n deurslaggewende slag naby die Gardameer (destyds onder sy Latynse naam Lacus Benacus bekend) plaasgevind waartydens Romeinse troepe 'n leër van Alemanniese krygers verslaan het.

Landskapsvorme en geologie[wysig | wysig bron]

Geskiedenis is die verbindende element tussen die drie verskillende landskapsvorme in die gebied van die Gardameer - die suidelike Alpynse bergwêreld van Trentino, die onmiddellike omgewing van die Gardameer met sy Mediterreense karakter, en die uitgestrekte Povlakte met Verona en Brescia as die grootste stedelike nedersettings in die nabyheid.

Die Gardameer is geologies die jongste van hierdie landskappe wat gedurende die laaste kouetydperk sowat 10 000 jaar gelede gevorm is toe gletsersmeltwater groot mere in die noorde van Italië laat ontstaan het. In die grootste en waterrykste valleie het gletsermorene as natuurlike damwalle bygedra tot die vorming van uitgestrekte mere. Die Alpe is al 60 miljoen jaar gelede geplooi, terwyl ook die magtige Povlakte reeds voor die begin van die ystydperk deur sedimente uit die berge gevorm is.[1]

Klimaat[wysig | wysig bron]

Die Gardameer is in die binnelandse Mediterreense klimaatsone geleë. Die Gardone Riviera teen die suidwes-oewer van die meer beskik oor die mees gematigde klimaat noord van die Apennyne-bergreeks. Die sogenaamde Ora, 'n termiese wind, sorg op namiddae daarvoor dat daar 'n gereelde lugbeweging is wat die noordelike Gardameer tussen Torbole en Malcesine besonder aantreklik maak vir windseilgeesdriftiges.

Wynbou[wysig | wysig bron]

Garda is 'n streek waar wyne van oorsprong (Italiaans: Denominazione di origine controllata, DOC) verbou word. Die plaaslike wingerde lewer wit-, rooi- en roséwyn op. Die wynstreek sluit 25 dorpe in die provinsie Brescia, 6 in die provinsie Mantua en 40 in die provinsie Verona in. Amptelike kultivare is Barbera, Cabernet Franc, Cabernet Sauvignon, Chardonnay, Cortese, Merlot, Pinot Blanc, Pinot Noir, Pinot Gris en Riesling. Die wynbougebiede van die DOC is Riviera del Garda Bresciano, Lugana, San Martino della Battaglia en Bardolino.

Besienswaardighede[wysig | wysig bron]

Die Grotte van Catullus is aan die suidelike oewer van die meer geleë.

Verwysings[wysig | wysig bron]

  1. Walter Pippke • Ida Leinberger: Gardasee, Verona, Mantua, Trentino. Kunst und Geschichte im Zentrum des Alpenbogens. 5de hersiene uitgawe. Ostfildern: DuMont Reiseverlag 2011, bl. 11

Eksterne skakels[wysig | wysig bron]