Gedrukte stroombaan

in Wikipedia, die vrye ensiklopedie
Spring na: navigasie, soek
Elektroniese komponente gemonteer op 'n gedrukte stroombaan

'n Gedrukte stroombaan word gebruik vir die montering van elektroniese komponente. Dit dien as 'n basis waarop elektroniese komponente gemonteer word, en huisves ook die elektriese verbinding tussen die komponente.

Geskiedenis[wysig | wysig bron]

Frank J. Sprague het in 1904 reeds 'n idee gehad om 'n gedrukte stroombaan te ontwikkel om punt tot punt bedrading te vervang. As vakleerling het Sprague die idee met sy mentor, Thomas Edison bespreek, en hulle het besluit om te eksperimenteer met die silwerverminderingsmetode, wat gebruik word in die vervaardiging van spieëls, asook met die druk van grafietpasta op papier.

Op 2 Maart 1925 het Charles Ducas die eerste gedrukte stroombaan in die VSA gepatenteer. Sy patent was gebaseer op die montering van metaal geleiers op isoleermateriaal, om die vervaardiging van elektriese toestelle te vereenvoudig. Ducas het 'n stensil gebruik om repies van geleidende pasta op 'n isoleermateriaal mee af te druk. Na die verwydering van die stensil was 'n elektrolitiese metaalafsettingsmetode gebruik om die repies van geleidende pasta mee te versterk. Hierdie ontwikkeling het die vervaardiging van elektriese toestelle aansienlik vereenvoudig.

Die grootste deurbraak in die ontwikkeling van die moderne gedrukte stroombaan was egter in die 1940's deur Paul Eisler. Eisler het voorgestel het dat 'n isoleermateriaal met koper geklee word, waarna 'n weerstandmateriaal op die koper gedruk word, en die onnodige koper dan weggeëts word. Eisler het ook voorgestel dat ogies gebruik word om die twee kante van 'n gedrukte stroombaan te verbind. Eisler word dikwels beskou as die vader van die gedrukte stroombaan.

Tussen 1953 en 1955 het Motorola die metaalplateringsmetode ontwikkel, wat dit moontlik gemaak het om die twee kante van 'n gedrukte baan te verbind sonder die gebruik van ogies.

Die gebruik van gedrukte stroombane het aansienlik toegeneem in die 1960's, a.g.v. 'n toename in elektroniese verbruikersware, en die vervaardiging daarvan is geoutomatiseer.

Komponente van 'n gedrukte stroombaan[wysig | wysig bron]

  • Die basis, is rigiede of buigsame bord gemaak van 'n isoleermateriaal, wat die geleiers en die elektriese komponente huisves.
  • Die geleiers, van koper gemaak, is repies of ander vorms wat aan die basis vasgeheg is.

Sien ook[wysig | wysig bron]

Eksterne skakels[wysig | wysig bron]

Bronnelys[wysig | wysig bron]

  • Printed Circuit Boards: Design, Fabrication, and Assembly (2005). Outeur: R.S. Khandpur. Uitgewer: McGraw-Hill Professional. ISBN 0071464204