Geografiegebou UP

Die Geografiegebou op die Hatfieldkampus van die Universiteit van Pretoria is oorspronklik gebou as ’n uitbreiding van die bestaande Dierkundegebou, maar die styl daarvan is kenmerkend anders as die van die bestaande gebou, en dit het baie meer in gemeen met die styl van die naasliggende Chemiegebou. Die gebou is deur argitek Brian Sandrock, ’n oud-student van die universiteit, ontwerp. Bouwerk het in 1956 begin en was teen Julie 1957 voltooi. Bouwerk is in moderne siersteen en sommige kenners meen dié styl herinner aan die Hollandse Baksteenmodernisme. Net soos die Landbou-, Kommunikasiepatologie-, Chemie- en Plantkundegeboue, is dit 'n goeie voorbeeld van Pretoria se Baksteenargitektuur.