Grasse

in Wikipedia, die vrye ensiklopedie
Spring na: navigasie, soek
Hierdie artikel handel oor die Franse stad. Vir die plantsoort, sien gerus gras.
Grasse
Grasse
Grasse
Wapen van Grasse
Wapen
Ligging van Grasse op 'n kaart (Frankryk)
Grasse
Grasse
Koördinate: 43°40′00″N 6°55′00″O
Land Vlag van Frankryk Frankryk
Gewes Flag of Provence-Alpes-Cote dAzur.svg Provence-Alpes-Côte d'Azur
Département Nice Arms.svg Alpes-Maritimes
Arrondissement Grasse
Kanton Grasse-Nord en Grasse-Sud
Regering
 - Burgemeester Jean-Pierre Leleux
Oppervlak
 - Stad 44,44 km²  (17,2 vk m)
Hoogte 80–1 061 m (260–3 481 vt)
Bevolking (2009)
 - Stad 52 019
 - Digtheid 1 171/km² (3 032,9/myl2)
Poskode 06130, 06520
Skakelkode(s) 06069
Webwerf: ville-grasse.fr

Grasse is 'n stad in die Suid-Franse département Alpes-Maritimes, sowat 20 kilometer van die Côte d'Azur, met 52 000 inwoners (2009). Dit staan bekend as die hoofstad van die Franse reukwaterbedryf.

Geografie[wysig]

Grasse lê op 'n heuwel in die suidelike uitlopers van die Alpe, sowat 350 meter bo seevlak aan die grootpad Route National 1085.

Geskiedenis[wysig]

Die eerste historiese verwysing na die stad dagteken uit die jaar 1040. In 1227 verower graaf Raimond Béranger Grasse en lyf dit by Provence in. By die indeling van die Franse départements tydens die Franse Rewolusie behoort Grasse nog by die département Var en dien ook as sy hoofstad. In 1860 word Grasse saam met die graafskap Nice 'n deel van die département Alpes-Maritimes.

Ekonomie[wysig]

Jasmynbloeisels

Sedert die 17de eeu spits die reukwatervervaardigers in Grasse hulle op die ekstraksie van die sap van veral die plaaslike lemoen- en jasmynbloeisels toe. Die jasmynplant, waarvan die bloeisels 'n hoofbestanddeel van baie reukwaters vorm, is tydens die 16de eeu deur die Sarasene in Suid-Frankryk ingevoer. Die jaarlikse oes van jasmynbloeisels in Grasse beloop tans 27 ton per jaar.

Die blommeplantasies, wat vroeër kenmerkend van Grasse en sy omgewing was, het nou skaars geword, aangesien die bloeisels meesal uit lande soos Marokko, Bulgarye, Indië of Turkye ingevoer word. Die plantekstrakte word naas reukwater ook vir kosmetika, afwasmiddels, waspoeier en geurstowwe in die voedselbedryf gebruik. Die reukwaterbedryf van Grasse skep tans werkgeleenthede vir 4 000 mense.

Sowat dertig fabrieke in Grasse en die omgewing voer hulle produkte wêreldwyd uit. Hulle verteenwoordig sowat twee derdes van die totale produksie van geurstowwe in Frankryk met 'n omset van jaarliks 600 miljoen Euro.

Besienswaardighede[wysig]

Die Rue des Soeurs, een van die kenmerkende straatjies in die ou stadskern
  • Die katedraal Notre-Dame du Puy dateer uit die 12de eeu en bekoor met sy minimalistiese boustyl. Dit spog met skilderye van Peter Paul Rubens, Jean Honoré Fragonard en Charles Nègre en 'n triptigon van Louis Bréa.
  • Die tuin Jardin des Plantes staan bekend danksy die suster van Napoléon Bonaparte, wat hier gereeld tydens die winter gebly het. Die tuin bied 'n pragtige uitsig oor die ou stadskern en die see.
  • Die blommeplantasies van die Domaine de Manon lê in 'n klein dorpie naby Grasse en is een van die historiese tuine van die plaaslike reukwaterbedryf.
  • Die Vlootmuseum dien ter herdenking van die groot Franse seevaarder admiraal François-Joseph Paul, graaf van Grasse (1722-1788). Hy staan bekend vir sy oorwinning in die seeslag van Chesapeake op 5 September 1781, waarmee die Amerikaanse Onafhanklikheidsoorlog beëindig is. Sowat dertig modelskepe word in die museum uitgestal.
  • Die ou herehuis van die Marquise van Clapiers Cabris, 'n suster van Mirabeau, huisves die Musée d'Art et d'Histoire de la Provence (Museum van die Provensaalse kuns en geskiedenis). Sy meubilering, steengoed, skilderye, kleredragte en ander voorwerpe gee 'n indruk van die daaglikse lewe in die oostelike Provence en strek van die voorgeskiedenis tot by die vyftigerjare van die 20ste eeu.

Eksterne skakels[wysig]

Commons-logo.svg
Wikimedia Commons het meer media verwant aan:
Grasse (kategorie)