Grootvorstepaleis van Litaue

in Wikipedia, die vrye ensiklopedie
Spring na: navigasie, soek
Model van die Grootvorstepaleis
Die kastele van Vilnius in 1740.
Bo-Kasteel: 1. Westelike of Gediminas-toring; 2. Suidelike toring (fondamente het bewaar gebly); 3. Paleis (bouvalle)
Laer Kasteel: 4. Stadspoorte en brug na die stad (Pilies-straat); 5. Pad en brug na Tilto-straat; 6. Sint-Basilius-katedraal; 7. Paleis van die Hooggeregshof; 9. Koninklike Paleis; 10. Paleistuin; 11. Paleisgebou, arsenaal vanaf die laat 18de eeu, huisves tans 'n museum; 12. Noord-oostelike toring en poorte van die arsenaal; 13. Die arsenaal se binnehof
Die gedeeltelik herboude paleis in 2009

Die Grootvorstepaleis van Litaue (Litaus: Lietuvos valdovų rūmai, Pools: Zamek Dolny w Wilnie) is in die 15de eeu vir die heersers van die Grootvorstedom Litaue in die hoofstad Vilnius opgerig. Die Grootvorstepaleis in die Laer Kasteel het geleidelik ontstaan; sy bloeityd was in die 16de en in die middel van die 17de eeu. Die Paleis het eeue lank die politieke, administratiewe en kulturele sentrum van die Grootvorstedom Litaue gevorm. In 1801 is die gebou verniel.

Sedert 2002 het volgens 'n besluit van die Seimas, die Litause parlement, 'n nuwe paleisgebou op die oorspronklike perseel ontstaan. Die gedeeltelik voltooide paleis is op 6 Julie 2009 ingewy. Hierdie heropening was een van die belangrikste gebeurtenisse tydens die Litause Millenniumfeesvierings ter herdenking van die eerste verwysing na Litaue in die Quedlinburgse Annale in die jaar 1009. Daarnaas was dit een van die hoogtepunte van die jaar waarin Vilnius naas Linz in Oostenryk as Europese Kultuurhoofstad gefungeer het.

Die paleis van die Litause grootvorste versinnebeeld die lang tradisie van Litaue as 'n onafhanklike staat en word as 'n simbool van nasionale trots beskou. Die gebou sal daarnaas as 'n nasionale kultuurerfenis vir opvoedkundige doeleindes gebruik word - onder meer om Litauers bewus te maak van die geskiedenis van hul land.[1]

Verwysings[wysig]