HMS Birkenhead
Die HMS Birkenhead was 'n Britse troepeskip wat op 25 Februarie 1852 by Danger Point met die verlies van baie lewens vergaan het. Die skip het bekendheid verwerf vir die tradisie van "vroue en kinders eerste".
Inhoud |
[wysig] Statistiek van die HMS Birkenhead
Die skip was 'n troepe draer van 1900 ton en een van die eerste Britse skepe wat met 'n staalromp toegerus was. Die skip was ook 'n wielstoomboot wat seile gedra het.
[wysig] Agtergrond
Die skip het op 25 Februarie uit Simonstad vertrek met 476 Britse soldate, 7 vroue, 13 kinders en 'n aantal perde aan boord. Die bestemming was die Oos-Kaap waar die soldate by die garnisoene daar sou aansluit aangesien die Agtste Grensoorlog gewoed het. Die kaptein van die skip was Robert Salmond.
[wysig] Die ramp
Die skip het 'n blinde rots ongeveer 1 km van Danger Point getref en die metaalromp het oopgeskeur. Ongeveer 100 soldate het verdrink terwyl hulle geslaap het in hulle banke op die onderste dek. Die oorblywende soldate is op die dek bymekaar geroep. In 'n deperate poging om die skip te red het kaptein Salmond bevel gegee om die masjien in trurat te gooi. Dit was 'n noodlottige besluit omrede die metaal romp van die skip nog verder oop geruk was.
Van die agt reddingsbote kon slegs drie te water gelaat word. Die vroue en kinders is in die bote gehelp met soveel mans as wat die bote kon vat. Toe is die bevel "Elke man vir homself. Almal wat kon swem, spring oorboord en swem na die bote" gegee. Die bevelvoerder van die troepe, lt-kol Alexander Seton het sy swaard getrek en die manskappe beveel om nie oorboord te spring nie omdat hulle dan die reddingsbote sou verswelg. Die bote het op daardie stadium gesukkel om van die HMS Birkenhead weg te kom. Die manskappe het die bevel gehoorsaam, selfs toe die skip in twee gebreek en die hoofmas en skoorsteen op die dek geval het.
Binne 20 minute het die skip gesink. Een reddingsboot het die kus by Hawston bereik. Die ander twee reddingsbote is opgepik deur 'n skoener wat onmiddellik na die ramp vertrek het. So is nog 50 man gered. Die skoener het uiteindelik Simonstad met 166 oorlewendes bereik. Nog 68 man en 8 perde het dit op eie stoom na die kus gemaak. Die res is nooit weer gesien nie, onder andere lt-kol. Seton en kaptein Salmond.
[wysig] Goud aan boord die HMS Birkenhead
Verskeie pogings is aangewend om goud ter waarde van £300 000 wat na bewering aan boord was te herwin. Niemand het egter nog ooit enige vondse gerapporteer nie.[1]
[wysig] Salmonsdam Natuurreservaat
Die Salmonsdam Natuurreservaat naby Stanford is na kaptein Salmond vernoem.[2]
[wysig] Verwysings
- ↑ Op Pad in Suid-Afrika. B.P.J. Erasmus. 1995. ISBN 1-86842-026-4
- ↑ Padlangs deur Suid-Afrika. 2010 ISBN 978-1-77007-751-5
