Haile Selassie

in Wikipedia, die vrye ensiklopedie
Spring na: navigasie, soek
Haile Selassie
"Neguse Negest" (Koning van die Konings)
Keiser van Ethiopië
Haile Selassie
Haile Selassie
Vorstehuis Solomon
Regeer 2 November 193012 September 1974
Kroning 2 November 1930
Voorganger Zewditu I
de jure Opvolger Amha Selassie I
de facto Opvolger Aman Andom
Volle naam Lij Tafari Makonnen
Gebore 23 Julie 1892; Ejersa Goro, Ethiopië
Oorlede 27 Augustus 1975; Addis Abeba, Ethiopië
Begrawe Heilige Drie-eenheid Katedraal, Addis Abeba, Ethiopië
Eggenoot Menen Asfaw
Kinders Romanework, Tenagnework, Asfaw Wossen, Zenebework, Tsehai, Makonnen, Sahle Selassie
Vader Makonnen Wolde Mikael
Moeder Weyziro Yeshimebet Ali Abajifar
Religie Ethiopiese Ortodokse Kerk

Hoewel Rastafariërs Haile Selassie beskou as die verpersoonliking van die lewende Verlosser van die swart ras, was Haile Selassie (Amharies: ቀዳማዊ ኃይለ ሥላሴ) self oënskynlik nie baie beïndruk met hierdie aanhang nie. Hy was 'n toegewyde Christen wat selfs by geleentheid geweier het om besoekende Rastafariërs uit Jamaika by sy paleis te woord te staan.

Selassie is op 23 Julie 1892 naby Hãrer, Ethiopië, gebore en in die Ethiopiese Ortodokse Kerk gedoop as Ras Tafari Makonnen. Hy was 'n kleinneef van die Ethiopiese keiser, Menelik II, en met sy hulp is die keiser se opvolger, Lij Iyasu, in 1916 onttroon en vervang met Zauditu, die keiser se dogter. Met Zauditu se dood in 1930 het Selassie, wat intussen haar hoof- uitvoerende amptenaar geword het, haar opgevolg en self keiser geword.

In 1931 het Selassie 'n grondwet goedgekeur waarvolgens Ethiopië se eerste parlement en regstelsel ingestel is. In 1936 het Selassie tydelik as banneling na Engeland gevlug nadat Italië sy land die vorige jaar binnegeval het. Met Brittanje se hulp is Italië later verslaan en het Selassie in 1942 teruggekeer om sy land te regeer. Hy was daarna onder meer verantwoordelik vir uitgebreide landhervormings, die beëindiging van slawerny (1942) en die verdere uitbreiding van Ethiopië se grondwet (1955).

Pogings om Selassie se regering omver te werp, is in 1960 suksesvol afgeweer, maar teen 1974 het 'n kombinasie van faktore - soos korrupsie in die regering, swak bestuur, droogte, inflasie en hongersnood - veroorsaak dat Selassie sy volk se steun grootliks verloor het. Hy is gedwing om van die troon afstand te doen en is op 27 Augustus 1975 in Addis Abeba oorlede.

Vir die meeste Rastafariërs was Haile Selassie egter steeds Jah op aarde, of minstens die beloofde verpersoonliking van Jah op aarde. Hulle maak daarop aanspraak dat hy die 225ste koning in die vorstehuis van Salomo was, en dat hy daarmee die oudste troon op aarde verteenwoordig het. Hierdie troon is volgens Rastafariërs 3 000 jaar oud (veel ouer as die Britse vorstehuis se sowat 500 jaar). Boonop is Ethiopië die enigste staat in Afrika wat kolonialisme suksesvol afgeweer het. Die kroning van Selassie was dus 'n vervulling van God se belofte aan koning Dawid.