Hector Pieterson
Hector Pieterson (1964 – 16 Junie 1976) het die Soweto-opstand van 1976 teen Apartheid verbeeld nadat 'n foto, geneem deur Sam Mzima, van die sterwende Hector wat deur 'n medestudent gedra word dwarsoor die wêreld gepubliseer is. Hy is op 12-jarige ouderdom deur 'n dwaalkoeël gedood nadat die polisie op betogende studente gevuur het. Hector het self nie aan die betogings deelgeneem nie[1]. Vir jare was 16 Junie (vandag Jeugdag, 'n openbare vakansiedag in SA) een van die mees simboliese dae van die stryd teen Apartheid.
Daar bestaan 'n algemene opvatting dat Hector die eerste kind was wat op daardie dag geskiet is, maar eintlik was dit Hastings Ndlovu maar sý dood is deur geen fotograaf op film vasgelê nie en hy het nooit baie bekend geword nie. Toe Hector geskiet is en neerval op die hoek van Moema- en Vilakazistraat, is hy opgetel deur Mbuyisa Makhubo (toe 18jaar oud), 'n medeskolier, wat saam met Hector se suster Antoinette (toe 17) in die rigting van Mzima se motor gehardloop het, waarmee hy na 'n nabygeleë kliniek geneem is waar hy dood verklaar is. Beide Mbuyisa en Mzima is na die tyd deur die polisie geteister en moes hulle ontduik. Mbuyisa se moeder het die Waarheids- en Versoeningskommissie vertel dat sy in 1978 'n brief van Mbuyisa uit Nigerië ontvang het maar sedertdien niks van hom gehoor het nie. Beide Hector Pieterson en Hastings Ndlovu lê begrawe in die Avalon-begraafplaas in Soweto.
Inhoud |
Pitso of Petersen of Pieterson [wysig]
Sedert Junie 1976, word Hector se van Petersen in die pers gespel, maar die familie dring daarop aan dat die korrekte spelling Pieterson is. Die Pieterson-familie het oorspronklik Pitso geheet, maar het 'n Afrikaanse van aangeneem in 'n poging om as "Kleurlinge" deur te gaan.
Omstrede hofsaak [wysig]
Op 9 Augustus 2002 stel die Amerikaanse prokureur Ed Fagan 'n $50-biljoen regsgeding namens die slagoffers in teen groot maatskappye wat die regering ondersteun het. Onder die eisers was Dorothy Molefi, Hector se ma. Die Suid-Afrikaanse regering, sowel as Nelson Mandela, Thabo Mbeki en Desmond Tutu het hulle hiervan gedistansieer.[2] Fagan is bekend vir 'n string regsake wat hy oor menseregte-kwessies aanhangig gemaak het om maatskappye tot skikkings te dwing. Die saak is in 2004 uit die hof gegooi.[3]
Hector Pieterson-museum [wysig]
Die Hector Pieterson-museum het op 16 Junie 2002 die eerste museum geword om in Soweto oop te maak. Dit huisves alle inligting oor die gebeure wat gelei het tot die Soweto-opstand. Dié museum kan aangetref word in Kumalostraat, Orlando-Wes in Soweto. Antoinette Pieterson werk as gids by die museum.
Verwysings [wysig]
- ↑ Soweto, 1976: ’n Inklusiewe herbegin 30 jaar later?, besoek op 31 Augustus 2008
- ↑ "Multi-billion dollar Apartheid lawsuit kicks off", Mail & Guardian, 10 Augustus 2002.
- ↑ "Court throws out apartheid cases", BBC News, 29 November 2004.
