Helladiese tydperk

’n Vaas uit die Laat-Helladiese tydperk IIIC1, omstreeks 1200–1100 v.C. (Louvre).

Helladies is ’n moderne argeologiese term vir ’n reeks tydperke in die kultuur van die vastelandse Antieke Griekeland tydens die Bronstydperk. Dit word gewoonlik in argeologie en kunsgeskiedenis gebruik as aanvulling van twee parallelle terme: "Sikladies", met verwysings na min of meer dieselfde reeks in die Egeïese Bronstydperk, en "Minoïes", met verwysing na die beskawing van Kreta.

Die skema word veral vir pottebakkersware gebruik as ’n dateringstelsel. Kunsartikels kan in Vroeg-, Middel- en Laat-Helladies ingedeel word, na aanleiding van die styl en tegniek. Laat-Helladies (LH) en Vroeg-Helladies (EH) word weer verdeel in I, II en III en dié nog verder (sien onder Tydperke). Sekere datums word aan die verskillende fases geheg, hoewel die term begin gebruik is voor die uitvinding van radiokoolstofdatering.

Die drie terme "Helladies", "Sikladies" en "Minoïes" verwys na die plek van oorsprong. Middel-Minoïese voorwerpe kan dus in die Siklade ontdek word, maar dit maak hulle nie Middel-Sikladies nie.

Tydperke

In plaas van die gebruik van lang name soos "vroeg-vroeg-Helladies", gebruik argeoloë I, II, III vir die tweede vlak, A, B, C vir die derde, 1, 2, 3 vir die vierde en A, B, C vir die vyfde vlak.

Tydperk	Datum (by benadering)
Vroeg-Helladies I	3200/3100–2650 v.C.
Vroeg-Helladies II	2650–2200/2150 v.C.
Vroeg-Helladies III	2200/2150–2050/2000 v.C.
Middel-Helladies	2000/1900–1550 v.C.
Laat-Helladies I	1550–1500 v.C.
Laat-Helladies II	1500–1400 v.C.
Laat-Helladies III	1400–1050 v.C.