Hermann Ludwig Eckstein
Hermann Ludwig Eckstein (1849 - 1893) was 'n goudmagnaat. Hy is in Stuttgart, Duitsland gebore as die ouer broer van Friedrich Eckstein. Sy pa was 'n Lutherse pastoor. Hy werk in sy eerste jare by 'n Duitse maatskappy in Engeland en arriveer in 1882 in Kimberley om die bestuur van die Phoenix-diamantmaatskappy oor te neem. Daar word hy vriende met Julius Charles Wernher en Alfred Beit en sluit saam met hulle aan by Jules Porges & Co. Namens die maatskappy gaan hy eers Barberton en dan Johannesburg toe. In 1888 begin hy die maatskappy H Eckstein & Co wat gou die toonaangewende mynfirma aan die Witwatersrand word. Hy word as die eerste president van die Kamer van Mynwese gekies, 'n posisie wat hy beklee van 1889 tot 1891. In 1892 gaan sy gesondheid agteruit en op 7 Desember 1893 sterf hy in sy geboortedorp.