Hertogdom

in Wikipedia, die vrye ensiklopedie
Spring na: navigasie, soek

'n Hertogdom is 'n gebied, leenwese, of domein wat deur 'n hertog of hertogin geregeer word. Histories was sommige hertogdomme in kontinentale Europa soewerein, terwyl ander, veral in Frankryk en Brittanje ondergeskikte distrikte van 'n koninkryk was. Tradisioneel is 'n groothertogdom, soos Luxemburg, gewoonlik as onafhanklik en soewerein gesien. Soewereine hertogdomme was algemeen in die Heilige Romeinse Ryk en Duitssprekende gebiede.

In Frankryk het 'n aantal hertogdomme in die Middeleeue bestaan. Koningin Elizabeth II van die Verenigde Koninkryk hou steeds die middeleeuse Franse titel Hertog van Normandië; die enigste grondgebied wat steeds met die Hertogdom van Normandië verbind is, is die Kanaaleilande. Belangrike Franse hertogdomme het ingesluit Normandië, Boergondië, Bretagne en Akwitanië.

In middeleeuse Engeland, is die gebiede Lancashire en Cornwall hertogdomme gemaak met sekere magte wat aan hulle hertoë gegee is. Die Hertogdom van Lancaster is in 1351 gestig maar dit is met die Kroon verenig in 1399 toe die Hertog Hendrik Bolingbroke die troon van Engeland as Hendrik IV bestyg het. Die Hertogdom van Cornwall is in 1337 geskep en is opeenvolgend deur Hertoë van Cornwall gehou wat ook erfgename van die kroon was. Die hertogdomme het sedertdien hulle politieke rol verloor.[verwysing benodig]. Daar is egter 'n voortslepende dispuut oor die status van Cornwall.[verwysing benodig]

Vandag is territoriale hertogdomme baie skaars; meeste hertogdomme wat in die laaste paar eeue toegeken is was suiwer simbolies van aard. Daar is vandag geen onafhanklike hertogdomme nie; slegs Luxemburg bestaan as 'n Groothertogdom.