Hoërskool Zwaanswyk
Hoërskool Zwaanswyk is 'n voormalige Afrikaansmedium hoërskool in die Kaapstadse voorstad Retreat. Die skool bied tans (2008) onderrig in Afrikaans sowel as Engels aan 'n multikulturele leerdergemeenskap, waarvan driekwart uit die voorstede Retreat, Steenberg en Lavender Hill kom. Die skool se verwante laerskool is Zwaanswyk Akademie, hoewel sommige leerders van Laerskool Paul Greyling in Vishoek tradisioneel ook die skool bygewoon het. Die leerdertal was 461 in 2008, 'n drastiese toename sedert die invoer van Engels as onderrigmedium. In daardie jaar was daar van graad tien tot twaalf 179 leerders, almal Afrikaans, maar in graad agt en nege, waarin Engels trapsgewys ingevoer word, altesaam 282, waarvan na raming tweederdes Engels was. Teen 2011 het die totale leerdertal tot 557 toegeneem. In die hoogste drie grade het 98 leerders Afrikaans Huistaal geneem vergeleke met 183 Engels Huistaal. In 2012 het die totale leerders toegeneem tot 566. In die drie hoogste grade het 222 leerders Engels as huistaal geneem, vergeleke met 89 Afrikaans as huistaal.
