Home Insurance Building

in Wikipedia, die vrye ensiklopedie
Die Home Insurance Building

Die Home Insurance Building is 'n kantoorgebou in Chicago (Illinois, Verenigde State), wat in 1885 opgerig is. Die gebou, wat reeds in 1931 afgebreek is om plek te maak vir die Field Building (tans die LaSalle Bank Building), het oor tien verdiepings met 'n hoogte van 42 meter (138 voet) beskik en word deur sommiges as die eerste wolkekrabber ter wêreld beskou. Die gebou is deur die argitek en ingenieur William LeBaron Jenney ontwerp.

Argitektuur[wysig | wysig bron]

Die Home Insurance Building is 'n tipiese voorbeeld van die Chicago School se argitektuur. Dit was die eerste gebou met 'n staalraamwerk, alhoewel merendeels giet- en smeedyster vir sy konstruksie gebruik is. Vanweë sy unieke argitektuur en raamwerk, wat die gewig gedra het, word die kantoorgebou dikwels as die eerste wolkekrabber ter wêreld beskryf. Hierdie bewering word nogtans deur talle deskundiges betwis, aangesien die Home Life Insurance-gebou eerder 'n soort hibriedkonstruksie verteenwoordig.

Volgens 'n forensiese ondersoek net voor sy sloping is vasgestel dat die gebou wel die eerste was, waarin sowel die verdiepings asook die buitemure net deur sy metaalraam gedra is. Desondanks dui die besonderhede van die ondersoek daarop dat die gebou se gewig ook op sy messelwerkelemente gerus het, veral om dit teen die sterk plaaslike winde te beskerm. Die gebou se gewig was volgens die ondersoek net sowat 'n derde van 'n soortgelyke steengebou, en munisipale beamptes was so verontrus hieroor dat hulle die boubedrywighede stopgesit het terwyl hulle die gebou se veiligheid ondersoek het.

In 1890 is twee bykomende verdiepings bo-op die oorspronklike gebou bygevoeg.

Koördinate: 41°52′47″N 87°37′55″W / 41.87972°N 87.63194°W / 41.87972; -87.63194