Homeros

in Wikipedia, die vrye ensiklopedie
Spring na: navigasie, soek
Homeros
Homer.jpg
Homeros. Romeinse voorstelling van sy voorkoms.

Gebore ca. 8ste eeu v.C., volgens Herodotus
Smyrna
Melesigenes, soos vertel in Pseudo-Herodotus
Oorlede onbekend
Ios
Blyplek Smyrna, Cyme (Aeolis), Chios
Nasionaliteit Antieke Griekeland
Vakgebied Samestelling van mondelinge poësie as reisende kunstenaar, uitvoer van 'n skool vir Rapsodies, die Homeridae, op Chios
Bekend vir Ilias, Odyssee, Homeriese Himne, Epiese siklus, ander Homerika
Beïnvloed deur Rapsodiese mondelinge poësie
Invloed op Klassieke werke (Westerse kanon)

Homeros (Grieks: Ὅμηρος) was ‘n Griekse digter en sanger wat geleef het vanaf ongeveer 800 v.C. – 750 v.C.[1] Hy het epiese gedigte geskryf waarin hy ‘n groot aantal oorgelewerde verhale oor helde, gode en mitiese vertellinge uit sy kultuur verwerk het. Twee epiese gedigte, die Ilias en die Odussee is die oudste bekende en bewaarde literêre werke van die Griekse letterkunde en word aan hom toegeskryf, al is daar nie sekerheid hieroor nie.

Geleerdes is ook nie eensgesind oor sy geboorteplek nie. Sommige meen dat hy uit Smyrna afkomstig is, ander reken van die eiland Chios.[2] Daar word gemeen dat hy dalk blind was. Die tyd en omstandighede waarin hy geleef het is grootendeels onbekend. Die Nederlandse geskiedkundige, Kees Ruijgh meen dat Homeros reeds in die negende eeu v.C. moes geleef het. Sy fisiese gebrek kan moontlik verduidelik waarom hy sy bestaan gemaak het deur verhale te vertel en te versamel en deur iemand anders laat opskrywe het. Ander beweer dat hy nooit bestaan het nie en dat die naam Homeros ‘n versamelnaam is vir die digters wat die Ilias en die Odussee geskryf het. Die Ilias en die Odussee is epiese gedigte waarin die stryd om Troje, ‘n stad in die noordweste van klein-Asië, beskryf word.

Die Ilias (so genoem na die ander naam vir Troje, Ilion) beskryf ‘n kort episode uit die stryd. Daar word slegs terloops aan die voorgeskiedenis van die episode geraak: die ontvoering van Helena die dogter van Leda en Zeus wat met koning Menelaüs van Sparta getroud was deur Paris die seun van koning Priamus van Troje, die veldtog om Helena te bevry onder leiding van Agamemnon en die gebeurtenisse tydens die eerste ses jaar van die beleg. Die eintlike tema van die Ilias is die wrok wat Achilles jeens die Griekse leier Agamemnon koester: wat spruit uit ‘n rusie oor ‘n slavin wat hulle buitgemaak het. Achilles onttrek hom as gevolg hiervan uit die stryd; wat rampspoedige gevolge vir die Grieke tot gevol het. Die dood van Achilles se wapenmakker Patroclus bring mee dat Achilles weer tot die stryd toetree om hom te wreek op die held Hektor. Die laaste episode handel oor Hektor se uitvaart. Die storie van die dood van Achilles toe hy getref word in die spreekwoordelike Achilleshiel en die inval van Troje deur van die Trojaanse perd gebruik te maak, kom nie in die Illias voor nie.

Die 24 boeke van die Odussee (afgelei vanaf die naam Odusseus van ‘n Griekse koning van die eiland Ithaka) is ‘n raamvertelling, waarin die verhaal van die tien jaar se terugreis deur Odusseus vertel word. Die kader vorm die vertel van die terugkeer van die held vanaf die eiland van die nimf, Calypso, sy verblyf by die paleis van die Phaiake en sy uiteindelike tuiskoms in sy koninkryk Ithaka, waar hy afreken met die vele hofmakers van sy vrou Penelope wat getrou op hom gewag het.

Ander werke word ook aan Homeros toegeskryf:

  • Batrachomyomachia, ‘n oorlog tussen paddas en muise.
  • Gesange gewy aan verskillende Gode.
  • Thebais, ‘n epos waarvan slegs fragmente behoue gebly het.

Verwysings[wysig]

  1. Herodotus 2.53.
  2. G.S. Kirk 1976, Homer and the Oral Tradition, Cambridge. ISBN 0-521-21309-6

Eksterne skakels[wysig]

Commons-logo.svg
Wikimedia Commons het meer media verwant aan:
Homeros (kategorie)