Honsjoe

in Wikipedia, die vrye ensiklopedie
(Aangestuur vanaf Honshū)
Honsjoe
Inheemse naam: 本州
Nasa-Satellietbeeld van Honsjoe
Nasa-Satellietbeeld van Honsjoe
Geografie
Ligging Oos-Asië
Koördinate 36°N 138°O / 36°N 138°O / 36; 138Koördinate: 36°N 138°O / 36°N 138°O / 36; 138
Argipel Japanse Argipel

Oppervlakte 225 800 km²
Hoogste punt Foedji 3 776 m
Administrasie
Vlag van Japan Japan
Prefekture Hiroshima, Okayama, Shimane, Tottori, Yamaguchi, Hyogo, Kioto, Mie, Nara, Osaka, Shiga, Wakayama, Chiba, Gunma, Ibaraki, Kanagawa, Saitama, Tochigi, Tokio, Akita, Aomori, Fukushima, Iwate, Miyagi, Yamagata, Aichi

Hoofstad Tokio
Grootste stad Tokio (13 617 445)

Demografie
Bevolking 104 000 000

Bevolkingsgroepe Japanners
Die wêreld se sewende grootste eiland en die grootste eiland van Japan

Honsjoe (Japannees: 本州, Honshū / Honsyū, [hoꜜɯ̃ɕɯː], , letterlik: "Hoofeiland" of "Hoofprovinsie") is die grootste en mees bevolkte eiland van Japan. Dit is suid van Hokkaido, wat aan die ander kant van die Tsoegaroe-seestraat geleë is, noord van Sjikokoe aan die ander kant van die Binnelandse See en noordoos van Kioesjoe aan die ander kant van die Kanmon-seestraat. Dit is die sewende grootste eiland ter wêreld volgens oppervlakte en die eiland met die tweede grootste bevolking ter wêreld ná Java. In Honsjoe se suidooste is Tokio, Japan se hoofstad en grootste stad, geleë.

Tokio, Japan se hoofstad en grootste stad op Honsjoe

Honsjoe vorm saam met Hokkaido, Kioesjoe en Sjikokoe die vier hoofeilande van die Japanse Argipel tussen die See van Japan in die weste en die oop Stille Oseaan in die ooste. Dié eiland grens in die noordweste aan die See van Japan, in die ooste aan die oop Stille Oseaan en in die suide aan die Filippynse See.[1]

Honsjoe is ongeveer 1 300 km lank en wissel in wydte tussen 50 en 230 km met 'n totale oppervlakte van 225 800 km², omtrent 60% van die totale oppervlakte van Japan. Dit is groter as die eiland Groot-Brittanje en effens groter as die Amerikaanse deelstaat Minnesota. Honsjoe se kuslyn is 5 450 km lank.

Honsjoe is bergagtig en vulkanies en loop gereeld onder aardbewings deur. Die Groot Kanto-aardbewing het Tokio byvoorbeeld in September 1923 erg beskadig. Die hoogste bergpiek op dié eiland is die aktiewe vulkaan Foedji teen 3 776 m, wat dit die wêreld se sewende hoogste eiland maak. Honsjoe het talle riviere insluitend die Shinanorivier, Japan se langste rivier. Dié eiland se klimaat is gematig, maar daar is 'n merkbare verskil tussen die oostelike en suidelike kant en die westelike en noordelike (See van Japan-kus) kant. 'n Bergreeks loop oor die hele lengte van Honsjoe. Benewens Foedji is die Japannese Alpe 'n belangrike landmerk van Honsjoe. Honsjoe se vulkane behoort tot die Ring van Vuur wat die Stille Oseaan van Nieu-Seeland tot Chili omsirkel.

Verwysings[wysig | wysig bron]

  1. "Honshu" (in Engels). Encyclopædia Britannica. Geargiveer vanaf die oorspronklike op 26 Februarie 2020. Besoek op 12 Augustus 2017.

Eksterne skakels[wysig | wysig bron]