Inryteater
'n Inryteater (of inry) is 'n rolprent-teater wat uit 'n groot skerm, projektorkamer, en groot parkeerarea vir motors bestaan. Kliënte kan in die inry rolprente vanuit die privaatheid en gemak van hulle motors kyk.
Die skerm word gewoonlik op 'n staalstuktuur gemonteer, hoewel 'n eenvoudige muur wat wit geverf is ook soms gebruik word. Die area tussen die skerm en eerste ry karre word dikwels as 'n speelarea vir kinders ingerig of vir ander vermaaklikhede gebruik. Advertensies word gewoonlik op die agterkant van die skerm aangebring om ekstra inkomste te verseker.
Die film word vanuit die projektorkamer op die skerm geprojekteer. 'n Snoepwinkel word soms aan die projektorkamer gebou om kliënte van verversings te voorsien.
Oorspronklik is die klank deur luidsprekers wat op die skerm gemonteer is gespeel, maar later is individuele luidsprekers gebruik wat aan die motors se ruite kon hak. Die stelsel is later vervang deur lae frekwensie radiouitsendings wat op die motor se radio opgevang kon word.
Inryteater was populêr in die laat 1950s en vroeë 1960s. Die koms van televisie en kostes verbonde aan groot landareas het geleidelik tot die uitfasering van inrye gelei. Vandag is slegs enkele inryteaters steeds in gebruik.
