Internationale Grüne Woche Berlin

in Wikipedia, die vrye ensiklopedie
Spring na: navigasie, soek
Die skouterrein van Berlin Messe
Die Grüne Woche in 2008

Die Internationale Grüne Woche Berlin, wat dikwels kort Grüne Woche genoem word, is 'n internasionale landbouskou wat jaarliks in Januarie in Berlyn gehou word. Dit is die beduidendste internasionale skou vir landbou, tuinbou en voeding waaraan vervaardigers en bemarkers van agrariese en tuinbouprodukte deelneem. Die handelskou word op die Berlynse handelskouterrein van Berlin Messe vlakby die uitsaaitoring gehou en staan sowel vir vakkundiges asook die algemene publiek oop.

Geskiedenis[wysig]

Die eerste Grüne Woche - destyds nog 'n nasionale landbouskou - is tussen 20 en 28 Februarie 1926 gehou. 'n Medewerker van die Berlynse toerismekantoor het toe die idee gehad om die tradisionele Winterkonferensie van die Deutsche Landwirtschafts-Gesellschaft ("Duitse Landbouvereniging") in Berlyn met 'n landbouskou te verbind. Sodoende kon ook landbouartikels, wat tydens die konferensie op straat aan die deelnemers verkoop is, op 'n geordende wyse aangebied word. Die skou, wat op 'n uitstalterrein met 'n totale oppervlakte van 7 000 vierkante meter gehou is, het reeds in die eerste jaar 50 000 besoekers gelok.

Die Grüne Woche is tot en met 1939 jaarliks gehou, met uitsondering van die jaar 1938 toe bek-en-klouseer uitgebreek het. Ná 'n onderbreking tydens die Tweede Wêreldoorlog is die skou in 1948 hervat. Die Grüne Woche het in 1950 weens boubedrywighede nie plaasgevind nie, maar is vanaf 1951 weer jaarliks gehou.

Die aantal buitelandse uitstallers het vanaf daardie jaar steeds verder toegeneem - in 1963 het hulle reeds twee derdes van alle uitstallers verteenwoordig. Sedert die 1990's het die Grüne Woche danksy die Duitse hereniging en die politieke verandering in Oos-Europa 'n groot opswaai beleef. Die landbouskou word afgerond met 'n aantal spesiale uitstallings asook referate, seminare en simposiums vir vakkundiges. Die meeste deelnemende lande, waaronder Suid-Afrika (wat gewoonlik deur Duitse invoerders verteenwoordig word), het hul eie stalletjies waar spesialiteite geproe en gekoop kan word. Internasionale voedselprodusente beskou die Grüne Woche as 'n belangrike produk- en toetsmark.

Die aantal uitstallers het in 2009 1 536 beloop, waarvan 556 uit die buiteland (58 lande).

Mediadekking[wysig]

Volgens die Messe Berlin GmbH, wat die landbouskou organiseer, is in 2009 meer as 7 000 joernaliste uit 72 lande geakkrediteer. Duitse televisiekanale het 700 bydraes en Duitse radiostasies 1 500 bydraes oor die Grüne Woche uitgesaai. Die aantal nasionale persberigte het 12 000 beloop.

IGW 2010[wysig]

Ter geleentheid van die 75ste Grüne Woche in 2010 is agrariese produkte en tradisionele spesialiteite uit Hongarye in die kollig geplaas. In die internasionale Blumenhalle ("Blommesaal") het Johann Wolfgang von Goethe se "Blommereis" (Goethes bunte Blumenreise) sentraal gestaan. Vir hierdie spesiale uitstalling is 'n reusagtige skulptuur geskep wat die befaamde Duitse digter uitgebeeld het, asook 'n bloeiende lentelandskap wat met een van die koudste Berlynse winters in jare gekontrasteer het.

Volgens Messe Berlin het elkeen van die meer as 400 000 besoekers (waaronder 100 000 vakkundiges) aan die landbouskou 'n gemiddeld van 22 € vir kos en drank bestee (2009: 25 €) en daarnaas goedere ter waarde van 84 € bestel (2009: 76 €). Die 1 586 uitstallers uit 56 lande het 'n totale omset van meer as 42 miljoen € (2009: 41 miljoen €) behaal en bestellings ter waarde van honderde miljoen € gekry. By verskaffers uit die Russiese Federasie is byvoorbeeld bestellings ter waarde van 200 miljoen € geplaas. Besoekers en uitstallers het tydens hulle verblyf in die Duitse hoofstad meer as 150 miljoen € bestee.[1]

Fotogalery[wysig]

Verwysings[wysig]

Eksterne skakels[wysig]

Afrikaanse persberigte

Commons-logo.svg
Wikimedia Commons het meer media verwant aan: