Internetradio

in Wikipedia, die vrye ensiklopedie
'n Internetradio-studio

Internetradio (ook e-Radio genoem) verwys na 'n oudio-uitsenderdiens wat deur middel van die internet uitsaai. Uitsending oor die internet word gewoonlik na verwys as websending, omdat dit nie breedweg deur draadlose metodes versend word nie, maar eerder oor die Wêreldwye Web. Die term "internetradio" behels 'n stromende medium wat aan luisteraars 'n aaneenlopende stroom klank bied, waaroor hulle geen beheer het nie — soos in die geval van tradisionele uitsendermedia. Internetradio is nie sinoniem met podgooiery nie, omdat podgooie afgelaai moet word en gevolglik kopieregkwessies meebring. Internetradio bied ook nie lêerbediening op aanvraag nie. Heelwat internetradiostasies staan in assosiasie met 'n ooreenstemmende tradisionele terrestriële radiostasie of -netwerk. Radiostasies wat slegs oor die internet uitsaai is gewoonlik onafhanklik van sulke instellings.

Internetradiostasies is normaalweg van enige plek op die aarde toeganklik. Dit is byvoorbeeld moontlik om na 'n Australiese stasie vanuit Europa of Amerika te luister. Hierdie voordeel maak dit 'n gewilde diens onder expats en vir luisteraars wie se behoeftes nie deur hul plaaslike radiostasies bevredig word nie (soos wat die geval mag wees met progressiewe rock, anime-musiek, klassieke musiek, stand-up-komedie, ensomeer). Sommige internetradiodienste bied nuus, sport en kommentaar aan, benewens 'n groot verskeidenheid musiek.

Eksterne skakels[wysig | wysig bron]