Inus Bester

Inus Bester, 2006

Inus Bester is die leier van die Suid-Afrikaanse Politieke Alliansie (afkorting: Safpa), 'n politieke party wat tans aktief is in die munisipale gebiede van Saldanhabaai en Matzikama (Vredendal).

Hy is op 5 Desember 2000 tot die munisipale raad verkies en het van Januarie 2001 tot Maart 2002 as onderburgemeester gedien. In April 2002 het hy 'n samewerkingsooreenkoms met die DA en onafhanklike raadslid Richard Majola gesluit waarna die raad by die ANC oorgeneem is. Met DA/Majola-steun is hy in April 2002 tot burgemeester verkies met Majola as onderburgemeester en Jan Cillié van die DA as speaker.

In September 2002 het twee DA-raadslede, byname Phillip Duiker en Morgan Moodaley, teruggekeer na hul voormalige party, die NNP. Die NNP en ANC het 'n samewerkingsooreenkoms gesluit wat die Bester/Majola/DA-raad weer tot 'n val gebring het. Bester was in 2007 lid van die opposisie-koalisie onder leiding van burgemeester Johanna Stoffels wat die Saldanhabaaise raad met 'n meerderheid van een lid (12 uit 23) geregeer het.

Ná die oorlooptydperk in 2007 het die ANC/ID-koalisie weer beheer oor die raad verkry, maar op Vrydag 8 Augustus 2008 het die opposisie-koalisie, bestaande uit Safpa, DA, ID, ACDP en onafhanklike Johanna Stoffels weereens beheer van die ANC oorgeneem met Stoffels as Uitvoerende Burgemeester en Bester as Uitvoerende Onderburgemeester.