Jökulsárlón

in Wikipedia, die vrye ensiklopedie
Die Jökulsárlón met die gletsermond aan die linkerkant
'n Ysblok op die nabygeleë strand

Jökulsárlón (afgelei van Yslands jökulsá "gletserrivier" en lón "strandmeer") is die bekendste en grootste van Ysland se gletsermere in die suidooste van die land. Die meer is aan die suidelike kant van die Vatnajökull-gletser tussen die Nasionale Skaftafellpark en Höfn, die administratiewe sentrum van Suidoos-Ysland, geleë. Met 150 meter is die meer die derde diepste in Ysland.

Die gletsermeer het eers in die 20ste eeu ontstaan nadat aardbewegings die Breiðamerkurjökull-gletserrivier se toegang tot die see afgesny het. Volgens geoloë kan die rivierloop in die toekoms deur nuwe aardbewegings moontlik weer herstel word. Die meer sal dan uitdroog.

Die Jökulsárlón is tans vanweë sy drywende ysberge, wat van die Breiðamerkurjökull se gletsertong wegbreek en hoogtes van tot by 15 meter bereik, een van die belangrikste toeriste-trekpleisters in Suidoos-Ysland. Die wye spektrum van kleurskakerings strek van grys en swart tot by ysblou. Die blou kleur word deur verskillende kristale en hul ligrefleksie veroorsaak, terwyl vulkaanas aan sommige ysberge 'n donker vooroms gee.

Die fauna van die gebied word deur die skúa of groot roofmeeu, wat in Junie en Julie naby die Jökulsárlón nes maak, en die meer se seehonde oorheers.

Digby die gletsermeer oorspan 'n brug die gletserrivier Jökulsá á Breiðamerkursandi. Die brug maak deel uit van die Yslandse ringpad Hringvegur wat langs die kuslyn van die land en ook langs die Jökulsárlón loop. As gevolg van die Atlantiese Oseaan se branders en die gepaardgaande erosie van die kus loop die brug gevaar om onderspoel te word. In hierdie geval sou die gletsermeer deur die natuurkragte in 'n oseaanbaai omskep word.

Die dramatiese natuurlandskap het naas talle fotograwe ook die rolprentbedryf al verskeie kere gelok, en die gletsermeer het as natuurlike agtergrond in rolprente soos James Bond – A View To A Kill, James Bond – Die Another Day, Tomb Raider, Beowulf and Grendel en Batman Begins gedien.