Jac Blanc

in Wikipedia, die vrye ensiklopedie
Jac Blanc
Gebore1 Junie 1979 (1979-06-01) (44 jaar oud) [1]
GenresPoprock[1]
Beroep(e)Sanger, liedskrywer, kitaarspeler[1]
EtiketteMusicology, Flying Solo, onafhanklik
AssosiasiesScattered Youth[1]
Webwerfjacblanc.co.za

Jac Blanc (gebore 1 Junie 1979)[1] is 'n Suid-Afrikaanse sanger, liedskrywer, en kitaarspeler vanuit George, Wes-Kaap. Sy musiek word beskryf as hoofstroom poprock met aansteeklike melodieë.[1] Sy lirieke handel oor die lewe, verlies, en liefde.[1]

Vroeë lewe[wysig | wysig bron]

Jac Blanc is op 'n plaas in die Tuinroete gebore. Hy ontwikkel van vroeg af 'n passie vir musiek.[1] Na matrikulasie bestee hy twee jare in Londen, waar blootstelling aan die musiektoneel daar hom inspireer om 'n loopbaan as 'n musikant na te volg.[1]

In 2001 vorm hy die musiekgroep Scattered Youth wat by konserte op die Tuinroete opgetree het.[1] In 2002 tree die groep by die KKNK op Oudtshoorn op.[1] Hul eerste blootstelling op TV was hul optrede by die Rock Art Café wat op die SAUK2-program Garaas uitgesaai is.[1]

In 2004 skryf Blanc in by die Cape Audio College in Kaapstad, waar hy 'n klankingenieurswesediploma oor een jaar voltooi. Hy keer terug na George in 2005 waar hy aan produksieprojekte vir die plaatetiket Musicology werk.[1]

Hy neem in 2006 sy debuutalbum, Die onbekende, saam met Darryl DeLange op en stel dit in 2007 vry.[1][2] Van die lirieke op die album is geïnspireer deur sy ervaringe as 'n toergids.[1]

DonkerLig/DarkLight (2009)[wysig | wysig bron]

In Julie 2008 het Jac Blanc se ondersteuningsorkes opgebreek en is Blanc 'n onwikkelingskontrak met 'n hoofstroom platemaatskappy aangebied. Die platemaatskappy het die opneem van tien nuwe snitte (demo's) gefinansier, maar het ná die opneem van twee volle snitproduksies besluit dat die werk nie kommersiële potensiaal het nie. Blanc het 'n permanente pos by 'n konstruksiemaatskappy gekry en het besluit om sy nuwe album sonder die hulp van 'n groot etiket te produseer. Ná 'n jaar in-en-uit die ateljee is die produksie van DonkerLig/DarkLight afgehandel en gratis op die internet vrygestel. Dit bevat drie snitte in Engels en agt in Afrikaans.

Die album is 'n introspeksie op die twee sye van Blanc se polêre persoonlikheid: sy lawwe kant en sy ernstige kant. Die albumnaam verwys na die vrolike snitte en die ernstige snitte wat saam op die een album verskyn.

Diskografie[wysig | wysig bron]

Verwysings[wysig | wysig bron]

  1. 1,00 1,01 1,02 1,03 1,04 1,05 1,06 1,07 1,08 1,09 1,10 1,11 1,12 1,13 1,14 Jac Blanc (Profiel). Openlanguages. URL besoek op 2017-06-30.
  2. 2,0 2,1 "Die Onbekende". Apple Music (in Engels). Geargiveer vanaf die oorspronklike op 2 Oktober 2018. Besoek op 30 Junie 2017.

Eksterne skakels[wysig | wysig bron]

Musiekvideo's[wysig | wysig bron]