Jagersfontein

Jagersfontein
Jagersfontein
Koördinate: 29°46′0″S 25°25′0″O
Land	Suid-Afrika
Provinsie	Vrystaat
Distriksmunisipaliteit	Xhariep
Plaaslike Munisipaliteit	Kopanong
Stigting	1870
Tydsone	SAST (UTC+2)

Jagersfontein is 'n klein dorp in die suid-weste van die Vrystaat in Suid-Afrika, naby Fauresmith. Jagersfontein is ook die tweede dorp in Suid-Afrika en die eerste in die Vrystaat om elektrisiteit te gebruik.

Geskiedenis

In 1870 het mnr. JJ de Klerk 'n diamant van 50 karaat opgetel op die plaas Jagersfontein. Die plaas het oorspronklik aan 'n Griekwa met die naam Jacobus Jagers behoort. Hierdie ontdekking het tot 'n diamantstormloop gelei. Op 29 Augustus 1870 is 'n gedeelte van die plaas Jagersfontein tot openbare delwery verklaar. Delwers moes een vyfde van hulle opbrengs aan die weduwee Visser, eienaar van die plaas wat haar man in 1854 vir ₤30 gekoop het, oorhandig. Die verkoop van sterk drank, 'onbehoorlike jolligheid' en delwery was op Sondae verbode.

Mynbou

In 1878 is die eerste maatskappy gestig om diamante te myn en in 1882 is Jagersfontein formeel tot dorp verklaar. Munisipale status is in 1904 toegeken. De Beers het uiteindelik verskeie kleiner maatskappye oorgeneem en hulle in een organisasie gekonsolideer om die vukaniese pyp te ontgin. Die myn is sedertdien gesluit. In 1893 is die Excelsior (971 karaat) gevind, die grootste wit diamant wat ontdek is tot die Cullinan-diamant in 1905 naby Pretoria gevind is. In 1895 is die President Reitz steen van 637 karaat gevind.

Sien ook

• Slag van Boomplaats, 'n veldslag wat naby die dorp plaasgevind het.