James Edgar

Ds. James Edgar (1789-1848) was 18 jaar lank tot aan sy dood predikant van die NG gemeente Somerset-Wes. Hy is langs die dorp se eerste NG kerkgebou begrawe.

Somerset-Wes se eerste NG kerkgebou is in 1819 ingewy, dieselfde jaar wat die gemeente gestig is. In dié kerk het ds. Edgar van 1830 tot 1840 die Woord bedien.

Ds. James Edgar (Skotland, 19 Januarie 1789 - Somerset-Wes, 22 Maart 1848) was een van die 25 Skotse predikante van die Presbiteriaanse Kerk wat van 1818 tot 1836 en weer van 1862 tot 1867 na Suid-Afrika gekom het, aanvanklik om die tekort aan predikante in die Nederduitse Gereformeerde Kerk te help aanvul en veral die koloniale regering se verengelsingsbeleid stukrag te gee, maar later om die sogenaamde liberale neigings onder predikante wat in Nederland opgelei is, teë te werk.

Hy kom in 1828 na die Kaap en word op 26 Mei 1828 as eerste leraar van wat toe as die gemeente Tijgerberg bekendgestaan het (die latere NG gemeente Durbanville), teen 'n salaris van £200 pond per jaar aangestel. Hy het gebots met die kerkraad omdat daar nie 'n pastorie was nie en hy dus sy eie huishuur moes betaal. Ook het hy moeilikheid met die koster en voorleser, H.F. Mellet, gehad en boonop kon die gemeentelede nie sy Hollands verstaan nie. Hy het dus die gemeente ná net twee jaar verlaat.

In sy tweede en laaste gemeente, die NG gemeente Somerset-Wes, waar hy ruim 17 jaar van 1830 tot aan sy dood gearbei het, was sy bediening blykbaar geseënd. Dit is nie bekend nie of hy reeds op Durbanville of eers op Somerset-Wes getrou het met Susanna Justina Malan, wat hom oorleef het.

Bronne

• Olivier, ds. P.L., Ons gemeentelike feesalbum. Kaapstad en Pretoria: N.G. Kerk-uitgewers, 1952.
• Dreyer, eerw. A. 1924. Eeuwfeest-Album van de Nederduits Gereformeerde-Kerk in Zuid-Afrika 1824 - 1924. Kaapstad: Publikatie-kommissie van de Z.A. Bijbelvereniging.
• Hofmeyr, George (hoofred.), 2002. NG Kerk 350. Wellington: Lux Verbi.BM.