Joego-Slawië
vanuit Wikipedia, die vrye ensiklopedie.
(Aangestuur vanaf Joegoslawië)
Joego-Slawië was tussen 1918 en 2003 die naam van drie opeenvolgende state in Suidoos-Europa op die Balkan-skiereiland. Die hoofstad van hierdie state was telkens Belgrado:
- Die eerste Joego-Slawië (1918-1941) was 'n koninklike diktatuur wat van 1918 tot 1929 bekend was as die Koninkryk van die Serwiërs, Kroate en Slowene en van 1929 tot 1941 as die Koninkryk van Joego-Slawië. Dit het bestaan tot dit deur die Duitsers ingeval is.
- Die tweede Joego-Slawië (1943-1992) was die bekendste. Die staat het van 1943 tot 1945 die Federale Demokratiese Republiek van Joego-Slawië geheet, van 1945 tot 1963 die Federale Volksrepubliek van Joego-Slawië en van 1963 tot 1992 die Sosialistiese Federale Republiek van Joego-Slawië.
- Die derde Joego-Slawië (1992-2003) het ontstaan na die Joego-Slawiese Oorlog en het bestaan uit Serwië en Montenegro. Die amptelike naam was die Federale Republiek van Joego-Slawië.
Vanaf 2003 het hierdie staat Serwië en Montenegro geheet, maar in 2006 het dit verdeel in aparte state, naamlik Serwië en Montenegro.
