Jungle Book Shōnen Mowgli

in Wikipedia, die vrye ensiklopedie
Spring na: navigasie, soek

Jungle Book Shōnen Mowgli (ジャングルブック 少年モーグリ Janguru Bukku Shōnen Mōguri?) is ’n anime-reeks wat gebaseer is op Rudyard Kipling se oorspronklike versameling kortverhale, The Jungle Book. Dit is in 1989 vir die eerste keer uitgesaai en strek oor 52 episodes.

Klankbaan[wysig]

Die Japannese openings- en slottemaliedere, "GET UP ~Aio Shinjite~" en "Chikyuu no ko (地球の子- letterlik, Kind van die Aarde), word deur die Japannese sangers Toshiya Igarashi en Hashimoto Shiori gesing. Die Engelse openings- en slottemalied, "Look Up" en "A Child is Learning" word albei deur die Amerikaanse sangeres Suzi Marsh gesing[1]. Hierdie Japannese anime-reeks is in Hindi oorgeklank en as The Jungle Book deur DD National tydens die vroeë 1990’s in Indië uitgesaai. Die Hindi-weergawe Jungle Jungle Baat Chali Haai (जंगल जंगल बात चली है) , is oorspronklike musiek deur Vishal Bharadwaj (met lirieke deur die liriekskrywer Gulzur), wat dit gedurende hierdie tydperk betreklik gewild gemaak het.

Tale[wysig]

  • Arabies: ماوكلي فتى الأدغال
  • Deens: Junglebogen
  • Duits: Dschungelbuch Shōnen Mowgli
  • Engels: Mowgli: The New Adventures of the Jungle Book
  • Fins: Mowgli: Viidakkokirja
  • Frans: Mowgli: Le Livre de la Jungle
  • Hindi: The Jungle Book (जंगल की कहानी )
  • Nederlands: Mowgli: Jungle Boek
  • Noors: Mowgli
  • Pools: Mowgli: Ksiega Dzungli
  • Spaans: Mowgli: El libro de la selva
  • Sweeds: Mowgli: Djungelboken

Karakters[wysig]

  • Mowgli: Die hoofkarakter in die reeks. Hy raak as baba in die woude van Seeonee vermis. Alexander neem hom as sy seun aan en maak hom as wolf groot. Dit wil voorkom of Mowgli tussen 7 en 10 jaar oud is gedurende die loop van die televisiereeks, hoewel die eerste episode hom as ’n peuter uitbeeld.
  • Alexander: Wolf met ’n swartblou-pels. Mowgli se stiefpa, Luri se wederhelfte en vader van Akru en Sura. Hy verkry leierskap van die trop wolwe nadat Akela besluit het om af te tree. Alexander moes eers in ’n geveg met Vermillion, hoewel onwillig, betrokke raak, omrede die Oerwoudwet hierdie vereiste voorskryf om die opvolger van Akela aan te wys. Tydens ’n bosbrand wat deur die woud woed, sterf Alexander wanneer hy sy trop teen Shere Khan beskerm.
  • Luri: Wolvin met ’n roomkleurige pels. Alexander se eggenoot/weduwee, Mowgli se stiefma en die moeder van Akru en Sura. Sy word later die trop se amptelike nuwe (en eerste vroulike) leier wanneer Akela weereens van sy pos afstand doen, nadat Mowgli gevra is om Vermillion te oortuig om die trop te lei. Sy het met ’n plan vorendag gekom om ’n oudlid van die trop, genaamd Grizzle, weer uit die trop te ban, hierdie keer tesame met sy bende, sonder om enigsins ’n stryd te ontketen.
  • Akru en Sura: Twee wolfbroeders - Akru beskik oor ’n bruin-en roomkleurige pels, terwyl Sura s’n swart-en-blou is, soos sy pa. Hulle is die seuns van Alexander en Luri; Mowgli se aanneembroers. Hulle is welpies wanneer Mowgli deur die wolfpaartjie aangeneem word, maar is volwasse in die opeenvolgende episodes. Akru en Sura is baie geheg aan Mowgli; hierdie verhouding bly regdeur die reeks dieselfde, selfs wanneer die twee wolwe elkeen die lêplek verlaat en ’n maatjie kry. Akru het ’n neiging om kortgebakerd te wees en impulsief op te tree, terwyl Sura meer koelkop deur die lewe gaan.
  • Akela: ’n Grys wolf. Die leier van die wolftrop, opmerklik wanneer Mowgli deur die trop aangeneem word en tydens die meeste van die seun se kleuterjare. Hy is baie oud en wys en word later gedwing om sy pos terug te neem na die afsterwe van Alexander.
  • Vermillion: Wolf met ’n vermiljoenkleurige pels. Lala se vader en Alexander se (eens) beste vriend. Hy ding met Alexander mee om leierskap van die trop te verower, wanneer sy vader, Akela, besluit om daarvan afstand te doen. Hy word ’n litteken op sy linkeroog toegedien. Dit word later aan die lig gebring dat hulle twee ook voorheen in ’n stryd betrokke was om Luri as huweliksmaat te wen. Hy het later weggetrek, sy dogter klaarblyklik agtergelaat en die leier van ’n ander trop wolwe in ’n klipwoestyngebied gaan word.
  • Shere Khan: ’n Tier, wat die hoofteenspeler regdeur die reeks speel. So wreed en slu wat hy is, oortree hy baie Oerwoudwette, wat die eet van mense en koeie insluit, sowel as sy oordadige gejag. Vir vele dinge toon hy geen vrees nie, behalwe vuur en vuurwapens. Sy beenbesering is deur Alexander gedurende ’n geveg toegedien. Die wond oor sy linkeroog is deur Mowgli met ’n dolk uitgekerf, in weerwraak vir een van Mowgli se nuwe mensvriende/toekomstige familielede wat deur die tier leed aangedoen is, wat Shere Khan heel mismaakt laat lyk. Tydens die laaste kragmeting tree Mowgli as oorwinnaar uit die stryd, deur Shere Khan in een van sy sye dood te steek.
  • Bagheera: ’n Swartluiperd; een van Mowgli se vriende wat feitlik as ’n lid van Mowgli se wolftrop erken word. Hy is die een wat Mowgli hoofsaaklik van die Oerwoudwet leer. Bagheera het ’n groot gedeelte van sy welpjare in die sorg van ’n Engelse gesin grootgeword.
  • Baloo: ’n Beer, en een van Mowgli se vriende. Hy dien ook as een van Mowgli se leermeesters, hoewel sy lesse meer geesdriftig en sagsinnig benader word.
  • Kaa: ’n Baie wyse luislang, sowel as een van Mowgli se vriende. Hy tree soms as Mowgli se mentor op.
  • Tabaqui: Shere Khan se handlanger. In teenstelling met die ander weergawes van The Jungle Book, is Tabaqui ’n knoeiende jakkals wie se werk op niks uitloop nie. Hy is ook berug vir sy leeglêery, gierigheid, stompsinnigheid en lafhartigheid. Tabaqui en ’n ander jakkals (of hiëna), kom hul einde tegemoet wanneer Mowgli en Shere Khan die laaste keer in ‘n stryd gewikkel is – beide jakkalse word deur waterbuffels deurboor.
  • Bucchus: ‘n Vet wolf wat glad nie behoorlik kan jag nie. Hy is meer geskik om as wolfwelpie-oppasser op te tree. Hy verskyn meermale in die eerste helfte van die reeks en word soms vir humor aangewend.
  • Vargas: ‘n Ou wolf wat deur Alexander van ‘n trop wilde honde gered is. Tydens sy eerste verskynings steel hy kos uit die trop se voorraad.
  • Lala: Wolvin met ‘n glansryke rooi pels, hoewel ietwat ligter as haar pa s’n. Sy is Vermillion se dogter en Akela se kleindogter. Sy tree vroeg in die reeks soos ‘n rabbedoe op en verseg om Mowgli as deel van die trop te aanvaar. Wanneer sy later in die reeks haar tienerskap bereik, is sy egter baie meer geheg aan hom. Sy en Sura is teen die einde van Jungle Book Shōnen Mowgli die ouers van twee wolfwelpies.
  • Kichi: Mowgli se katbeer-vriendin. Haar ouers is deur mense om die lewe gebring. Sy bly later saam met Mowgli in sy hut. In die Engelse weergawe word Kichi as manlik uitgebeeld. In die Duitse weergawe word Kichi na Kiki herdoop.
  • Linda: ‘n Welwillende Engelse dogtertjie wat Bagheera as welpie aanneem en as troeteldier aanhou. Bagheera deel Mowgli van haar deur opeenvolgende terugflitse mee. Sy koester ‘n liefde vir enige dier, maar klaarblyklik veral vir Bagheera. Dit wil voorkom asof sy op ‘n manier ‘n sekere begrip en simpatie veral teenoor diere beskik. Wanneer haar vader ‘n poging aanwend om Bagheera onder skoot te kry, tree Linda as menslike skild vir Bagheera op en probeer hom help ontsnap deur hom vry te laat. Wanneer haar pa weereens voor haar en Bagheera te staan kom, probeer Linda die spervuur van Bagheera afweer. Sy word raakgeskiet, hoewel haar lot nie bekend gemaak word nie.
  • Linda se Vader: ‘n Selfsugtige en gelddorstige wildjagter wat vasbeslote is om Bagheera as trofee in die hande te kry. Na vele probeerslae, wat altyd deur Linda (wat opsetlik tussenbeide tree) gedwarsboom word, skiet hy sy dogter raak.
  • Bougi/Anwar: Meshua/Jumeirah se oupa van moederskant af en Mari/Meshua se pa, wie Mowgli alvorens sy kleindogter, dogter en skoonseun ontmoet. Hy tref Mowgli in ‘n valgat aan waarin die jong seun geval het. Aanvanklik is Mowgli onseker of hy hom kan vertrou, weens die reputasie van die mens, en sy geskiedenis met diere, wat in die oerwoud in omloop is, totdat Bougi hom van voedsel voorsien en help aansterk. Bougi toon ‘n baie goedhartige persoon te wees. Hy word deur Shere Khan op die rug oopgekloof terwyl hy Mowgli en Meshua teen die tier beskerm, maar herstel gelukkig. In die Engelse weergawe staan hy as Anwar bekend.
  • Mari/Meshua: Meshau/Jumeirah se moeder, Bougi/Anwar se dogter en Nil/Sanjay se vrou. Wanneer die gesin die eerste keer Mowgli ontmoet, maak sy verkeerdelik die aanname dat Mowgli haar biologiese seun is. Ten spyte daarvan dat dit nie die geval is nie, behandel sy hom nog steeds soos haar eie seun – sy raak vreesbevange en raai Mowgli desperaat af om Shere Khan nie aan te vat nie. Haar naam word ironies na Meshua verander (wat Jumeirah se oorspronklike naam in die Japannese weergawe is) by die Engelse oorklanking.
  • Nil/Sanjay: Meshua/Jumeirah se vader, Mari/Meshua se man en Bougi/Anwar se skoonseun. Soos die ander gesinslede, aanvaar hy ook daar en dan Mowgli as deel van hulle. Sodra die gesin ontvoer word, help Mowgli hulle ontsnap, deur party diere as gidse hulle na ‘n ander dorp weg te lei, terwyl die res die inwoners se wonings met die aarde gelyk maak. Nil beswyk aan longontsteking op die pad. Hy word in die Engelse weergawe Sanjay genoem.
  • Meshua/Jumeirah: ‘n Meisie van wie Mowgli baie later in die reeks begin hou. Sy het ‘n troetel-igneumon genaamd Rikki Tikki, ter verwysing na Rikki Tikki Tavi uit een van die kortverhale uit The Jungle Book. Haar oupa het eerste op Mowgli afgekom, toe die seun van sy wolftrop geskei was, omrede hy hom aan sy kleinseun herinner het. Hoewel Mowgli verkies om in hierdie tydperk eerder in die oerwoud te bly, ontmoet hy tog uiteindelik sy mensvriendin, Meshua. Meshua se gesin neem later vir Mowgli as hul nuwe seun aan, omrede hul ander seun gesterf het. Haar naam is Jumeirah in die Engelse weergawe.
  • Chill: ‘n Valk wat die boodskapper van Akela se trop en Hathi, die Groot Olifant, is.
  • Hati/Hathi: Die Groot Olifant, wat oor die hele Seeonee-woud heers.
  • Sandah/Thunder: ‘n Jong wolf uit Vermillion se wolftrop, met ‘n blou-swart pels. Sandah verafsku die mens, omrede hulle sy suster, Dulia, van kant gemaak het – hy verwyt om hierdie rede dus vir Mowgli, vanweë hy ‘n mens is. Oor die lange duur kom hulle twee tog in vergelyking met mekaar, en, selfs al keer hy saam met Vermillion terug woestyn toe, wil dit voorkom asof Sandah en Mowgli ‘n noue kameraadskap-verstandhouding met mekaar het. Sandah blyk om ‘n soort lieutenant, of beta-wolf, vir Vermillion te wees. Sekere vertalings beeld Sandah as vroulik uit.
  • Grizzle/Bunto: ‘n Wolf met roomkleurige pels (partykeer afgewissel deur grys by sommige tonele) en ‘n donkerbruin vlek rondom sy linkeroog, wat, as skurk, ‘n voormalige lid van Akela se trop was. ‘n Groot gedeelte van sy linkeroor ontbreek. Grizzle was vroeër ‘n goeie wolf gewees, wat ontaard het, uit die trop weens oortreding van die Oerwoudwet geban is en sedertdien verbitterd geraak het. Hy het na die bose kant oorgeloop nadat hy met Shere Khan bevriend geraak het, wat Grizzle opgesteek het om sy ontbanning te wreek. Grizzle is ‘n bendeleier en word deur drie ander wolwe vergesel, wat ook sy trawante is. Ná ‘n skermutseling tussen Mowgli se vriende en hierdie bende, word Grizzle deur Mowgli verslaan, deur met ‘n klipmes die nekslagaar af te steek. Grizzle heet Bunto in die Duitse weergawe, hoewel daar onsekerheid heers of dit die oorspronklike benaming in die Japannese reeks is.
  • Sargah: ‘n Grys-en-wit wolf (hoewel hy soms donkerblou-en-ligblou voorkom) en een van Grizzle se handlangers. Hy strewe daarna om eendag Grizzle se opvolger te wees. Hy sweer saam met Grizzle en die twee ander bendewolwe om Akela as leier te onttroon. Sargah word maklik beïndruk en is baie liggelowig – tot so ‘n mate dat Grizzle hom hierdeur maklik soos ‘n “wolfmarionet” kan beheer. Sargah en die ander bendelede kibbel en twis gereeld onder mekaar.
  • Kim: ’n Donkergrys-en-roomkleurige wolf en Sargah se seun. Deur sy liggelowigheid en naïwiteit, toon hy duidelik ‘n riempie uit die ou vel gesny te wees. Dit kom veral aan die lig wanneer Lala vir hom inligting deurvoer oor Akela se gesondheid- en kwesbaarheidtoestand. Dit vorm deel van Luri se plan om Grizzle en sy bende tot die aanval uit te lok. Kim is so halsoorkop verlief op Lala, dat dit sy gesonde verstand benewel. Kim dra hierdie nuus oor, wat die bende laat planne beraam om Akela se ondergang te bewerkstellig.
  • Louis: ‘n Aap wat merendeels deur wit pels bedek word (behalwe sy gesig, hande en voete) wat die leier oor al die ander ape is, asook die hooflakei en wenkgewer van Shere Khan. Louis en die ander ape laat dikwels ‘n spoor van verwoesting regoor die oerwoud agter, waartydens hulle ook die oerwouddiere uittart. Op een tydstip het Louis en die ander ape ‘n ketting gevorm en Mowgli oor die oerwoud weggevoer na ‘n bouvallige tempel. Dit is hier waar die seun van die mense, wat vroeër hier gebly het, se goeie en slegte eienskappe van te hore kom, maar veral van hul gretigheid om die verlore skat in die murasie te vind.
  • Dusty & Jacko: Twee wit ape (een vroulik, een manlik) wat saam met die ander ape vir Mowgli treiter en sy hut onder Shere Khan se bevel vernietig. Hulle word uiteindelik deur Mowgli, Bagheera, Baloo en Kaa gevang en gewaarsku om geen verdere opdragte van Shere Khan uit te voer nie.
  • Maki: ‘n Oranje wolvin en Akru se lewensmaat. Maki is ‘n voortreflike sangeres; tydens een episode word daar vertoon waar sy vir Akru sanglesse gee. Sy is ‘n geringe karakter en kom eers laat in die televisiereeks voor.
  • Buldio: ‘n Man uit die dorpie, en nog ‘n skurk in die verhaal, wat grootpraat oor sy vermeende skermutselings met die oerwouddiere. Na een staaltjie wat Shere Khan betrek, verskil Mowgli openlik van Buldio, waarna ‘n onderonsie plaasvind. Wanneer Mowgli met Shere Khan se huid terugkeer, oortuig Buldio die ander dorpelinge dat Mowgli beslis ‘n towenaar is – veral nadat hulle opmerk hoe hy sy dierevriende deur ‘n sekere ‘‘towerkrag’’ roep – en draai teen hom. Wanneer die dorp deur die diere binnegeval word, probeer Buldio om vir Bagheera, Sura en Akru te skiet. Mowgli gryp Buldio se geweer; Buldio smeek om sy lewe. Dit is eers wanneer Mowgli die geweer breek dat Buldio uit die oerwoud op vlug slaan. Na die tyd is Buldio en Riswan op soek na Mowgli om hom gevange te neem en te verkoop.
  • Abdullah: ‘n Dorpeling wat saam met Buldio, Riswan en ‘n paar ander mans op oerwouddiere jag maak. Hulle ontvoer Mowgli se aanneem-mensgesin en beleër die dorpie. Die laaste keer wat Abdullah opgemerk is, is toe hy die hasepad kies nadat die diere die dorp in puin gelê het.
  • Riswan/Gallo: Buldio se vriend, wie se paaie later weer met Mowgli s’n kruis. Hy begrawe oënskynlik die strydbyl en nooi Mowgli selfs vir ete uit, sonder om enige onraad te laat deurskemer. Riswan het egter Mowgli se drank met slaappoeier gedokter, met die doel om hom later aan ‘n sirkus te verkoop. Hy heet Gallo in die Duitse weergawe, hoewel daar onsekerheid heers of dit die oorspronklike benaming in die Japannese reeks is.

VHS- en DVD-vrystellings[wysig]

In 1990 het Strand VCI Entertainment slegs die eerste tien episodes afsonderlik op VHS onder die benaming van "The Jungle Book" uitgereik. Dit is versprei deur Nippon Video en word nie meer vervaardig nie. Onder sy oorspronklike titel is die hele reeks as ‘n aantal DVD-stelle in Japan versprei, terwyl enkele gekose episodes op vier DVD’s (twee episodes per DVD) in Australië bekend gestel is. Daar is ook ‘n agt-volume DVD-stel in Indië vrygestel. Die Italiaanse weergawe het via die DVD-medium op 16 Junie 2008 op die rakke verskyn. Daar is tans geen planne om ‘n DVD-vrystelling in die Verenigde State van stapel te stuur nie.

Die VHS-titels lui as volg:

Mowgli Comes To The Jungle

Mowgli Comes To The Jungle-The Adventure Continues

Alexander's Son

More Important Than The Law Of The Jungle

A New Friend

A Cold Fang

A Devil In Mind

Kichi Is Alone

A Thief In The Village

Sorry, Baloo!

Die DVD-titels wat in Australië uitgereik is:

Volume 1: Mowgli Is Born/ Mowgli Goes Hunting

Volume 2: Mowgli's Journey/ A Trip Of Adventure

Volume 3: A Cold Fang/ Sorry, Baloo!

Volume 4: Return Of The Brave/ Chilly Woods

Verwysings[wysig]

Eksterne skakels[wysig]

Hierdie artikel is in sy geheel of gedeeltelik vanuit die Engelse Wikipedia vertaal.