Kaap Agulhasvuurtoring
Kaap Agulhasvuurtoring is 'n vuurtoring by Kaap Agulhas, die suidelikste punt in Afrika.
Die 27 meter hoë ronde toring is wit geverf met rooi strepe. Die vuurtoring wat op 1 Maart 1849 in gebruik geneem is, is gebou volgens die model van die Pharos van Alexandrië, een van die Sewe wonders van die antieke wêreld. Daar is in 1840 in Kaapstad begin met die insameling van fondse vir die bou van 'n vuurtoring by Kaap Agulhas. Bydraes deur die publiek en owerhede is aangevul met bydraes uit Kalkutta, Bombaai, Madras, Manila, Sint Helena en Londen. Michiel van Breda na wie die nabygeleë Bredasdorp vernoem is, en die plaas Zoetendalsvlei besit het, het ingestem om so veel grond as wat nodig sou wees te skenk om die vuurtoring te bou. In 'n toespraak in Kaapstad het hy verwys na die Arnistonskeepsramp van 30 Mei 1815 waarin slegs ses van die 378 mense aanboord oorleef het.
Bouwerk het op 1 April 1847 begin en is teen Desember 1848 voltooi. Lig is aanvanklik verskaf uit vet uit skaapsterte. In 1905 is die vetlamp vervang met 'n olielamp wat in 1914 opgegradeer is na 'n roterende stelsel wat 470 000 kerskrag gelewer het. In 1936 is 'n elektriese lig geïnstalleer wat 12 000 000 kerskrag gelewer het. In 1962 het die sandsteen waaruit die toring gebou is begin ingee en in 1968 is 'n tydelike aluminium-vuurtoring naby die hoofvuurtoring opgerig.
Die toring is in 1973 tot Nasionale Monument verklaar. Nadat die toring teen 1988 herstel is, is die lig van die tydelike toring by die nuwe Groenriviermondvuurtoring gebruik[1] . Op 28 Januarie 1994 is 'n vuurtoring museum by die toring amptelik geopen. [2] [3]
[wysig] Kulturele Erfenis
Die Kaap Agulhasvuurtoring is op 2 Maart 1973, deur Johannes Petrus van der Spuy, Minister van Nationale Onderwys, as 'n nasionale monument verklaar, en word beskerm as 'n provinsiale erfenisterrein in gevolge van die Wet op Nasionale Erfenishulpbronne (25/1999). [4]
[wysig] Verwysings
- ^ Voetspore op die Strand, Dag Sewe en vyftig, Besoek op 22 Desember 2006
- ^ Lighthouses of South Africa, Cape Columbine, Besoek op 22 Desember 2006
- ^ Cape L'Agulhas, The Lighthouse, Besoek op 22 Desember 2006
- ^ Suid-Afrikaanse Erfenishulpbronagentskap - Item: 13046, Besoek op 21 Mei 2012
[wysig] Eksterne skakels
 |
|
|---|---|
| Atlantiese Kus en Valsbaai: |
Port Nolloth | Hondeklipbaai | Groenriviermond | Doringbaai | Stompneuspunt | Kaap Columbine | North Head | South Head | Dasseneiland | Robbeneiland | Milnerton | Kaappunt (Diaspunt) | Kaappunt (Kaap Maclear) | Kaapstadhawebreekwater | Kaap St. Martin | Mouillepunt | Groenpunt | Slangkop | Simonstadskeepswerf | Roman Rock |
| Kaapse Suidkus: |
Danger Point | Hangklip | Quoin Point | Kaap Agulhas | Kaap Infanta | Kaap Sint Blaize | Cape Seal | Ystervarkpunt |
| Oos-Kaap: |
Castle Point | Donkin Hill | Groot-Vispunt | Hood Point | Kaap Hermes | Kaap Morgan | Kaap Recife | Seal Point | Voëleiland |
| KwaZulu-Natal: |
Anglo-American Gebou | Cooper | Ou Bluff | North Sand Bluff | Port Shepstone | Green Point (Clansthal) | Richard's Baai Noord-Breekwater | Richardsbaai | Kaap St. Lucia | Jesser Point | Umhlanga Rocks | Kaap Vidal |
