Kanadadag

in Wikipedia, die vrye ensiklopedie
Honderdduisende mense vergader jaarliks op 1 Julie in die Kanadese hoofstad Ottawa om Kanada se nasionale dag te vier

Kanadadag (Engels: Canada Day, Frans: Fête du Canada) is die Nasionale Dag van Kanada ter herdenking van die stigting van die Dominium van Kanada op 1 Julie 1867. Dit is 'n openbare vakansiedag wat jaarliks op 1 Julie deur alle provinsiale regerings en die oorgrote meerderheid van die sakewêreld dwarsoor die land gevier word.

Kanadadag is vir baie Kanadese 'n dag vir buitemuurse aktiwiteite in die vroeë Kanadese somer. Dit is ook die belangrikste patriotiese vakansiedag van die land en word dikwels ook "Kanada se verjaarsdag" genoem, veral in die populêre pers.

Alhoewel dit die datum is waarop die huidige Kanadese grondwet in werking getree het, word met die eerste dag in Julie nie die presiese datum van Kanada se onafhanklikwording of stigting gevier nie. Die dag herdenk eerder die begin van die totstandkoming van die Kanadese konfederasie as gevolg van die Britse Noord-Amerika-wet (Engels: British North America Act). Die Britse parlement het ook ná die jaar 1867 nog groot invloed op die regering van Kanada uitgeoefen, en baie van die land se huidige provinsies het nog nie bestaan nie.

Die datum herdenk dus eerder die belangrikste stap in die politieke proses wat uiteindelik tot Kanadese selfregering gelei het. Dit was ook die begin van Kanada se soewereiniteit, wat met die Statuut van Westminster aansienlik bevorder en met die proklamasie van die Constitution Act deur Elizabeth II, koningin van Kanada, in 1982 uiteindelik erken is.