Kers

in Wikipedia, die vrye ensiklopedie
Spring na: navigasie, soek
Drie kerse in die donker
Kerse in St Mary's Church, Wheatley, Engeland

Kerse is silindervormige stawe van vet, stearien, paraffien of byewas met 'n brandbare pit van katoen in die lengte daardeur wat tradisioneel naas houtvuur, toortse, olie- en vetlampe gebruik is om lig te gee. Sodra die kerspit aangesteek word, smelt die vet of was en word dit deur kapillêre werking in die pit gesuig. In sy hoër dele gaan dit deur verdamping en ontleding in 'n gasvormige toestand oor en verbrand - 'n proses waarby warmte en lig uitgestraal word.

Kerse speel vandag nog 'n belangrike rol as binnens- en buitenshuise versiering en word, vanweë die feestelike atmosfeer wat hulle skep, steeds vir godsdienstige en spirituele doeleindes in plekke van aanbidding soos kerke gebruik. In Christelike lande word kerse veral oor Kersfeestyd aangesteek.