Kindle Fire

in Wikipedia, die vrye ensiklopedie
Spring na: navigasie, soek
Amazon se Kindle Fire

Die Kindle Fire is 'n minitabletrekenaar-weergawe van die Amerikaanse aanlynwinkel Amazon.com se Kindle-e-boekleser.

Die toestel, wat op 28 September 2011 aangekondig is, het 'n 7 duim-multiraakskerm met IPS-tegnologie en het 'n aangepaste weergawe van Google se Android-bedryfstelsel as raamwerk vir sy sagteware. Kindle Fire-gebruikers het toegang tot Amazon se toepwinkel, rolprente en TV-programme (wat as stroming aangebied word) en Kindle-e-boeke.

Kindle Fire is op 15 November 2011 op die Amerikaanse mark ingevoer. Op 7 September 2012 is 'n opgradering vir die toestel asook weergawes vir Europese markte met nasionale Amazon-aanlynwinkels aangekondig (Verenigde Koninkryk, Frankryk, Duitsland, Italië en Spanje).

Die Kindle Fire se afmetings is 7,5×4,7×0,45 duim (190×120×11 mm), met 'n sigbare skerm van 6×3,5 duim (150×89 mm). Die verkoopprys was aanvanklik VSA-$199. Die materiaalkoste is op tussen $150 en $201,70 beraam. Amazon se bemarkingstrategie is om geld met die verkoop van digitale inhoud te verdien, eerder as met die toestel self. Op 6 September 2012 is die verkoopprys verlaag tot $159, die RAM tot 1GB en die verwerker se klokspoed tot 1,2GHz opgegradeer. Daarnaas is 'n nuwe weergawe met 'n hoër skermresolusie ingevoer, die Kindle Fire HD, wat meer geskik vir video's is.

In Oktober 2012 was die Kindle Fire die tweede mees verkoopte tabletrekenaar ná Apple se iPad, met 7 miljoen verkoopte eenhede volgens Forrester Research.