Koelhouer
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
'n Koelboks of koelhouer word algemeen gebruik om kos, medisyne en ander voorraad koel en vars te hou. Dit kan van verskeie materiale gemaak word, waaronder plastiek, lap en metaal. Vir termiese isolasie is dit gewoonlik dubbelwandig met isolasiemateriaal tussen die binne- en buitewand.
Koelbokse word algemeen gebruik vir die vervoer van voedsel en drank. So kan 'n koelboks byvoorbeeld vir 'n uitstappie, soos 'n dag op die strand, gepak word. Dit is ook handig om bederfbare voedsel (soos botter en roomys) vanaf die winkel huis toe te vervoer. Van die ander gebruike sluit in die vervoer van hittesensitiewe medisyne en organe vir oorplantings.
Koelelemente word soms gebruik om die inhoud van die koelboks koud te hou. Die koelelemente word vooraf gevries en wanneer benodig saam met die voorraad in die koelhouer geplaas.
Van die duurder modelle is soos yskaste uitgevoer en kan (naas koelelemente) ook deur ander metodes verkoel word. So kan 'n elektriese koelboks by 'n motor se aansteker ingeprop word. Ander modelle kan weer met behulp van 'n gas- of spiritusbrander verkoel word.
Die draagbare koelboks is deur Richard C. Laramy van Joliet, Illinois uitgevind. Laramy doen op 24 Februarie 1951 aansoek vir 'n patent (verwysing 212,573). Die patent (#2,663,157) is uiteindelik op 22 Desember 1953 toegeken.
