Koperstreek-universiteit

in Wikipedia, die vrye ensiklopedie
Koperstreek-universiteit

Leuse in Afrikaans:Kennis en Diens
Leuse in Engels:Knowledge and Service
Gestig:1987
Tipe:Openbare universiteit
Ligging:Kitwe, Koperstreek, Zambië
12°48′20″S 28°14′25″O / 12.80556°S 28.24028°O / -12.80556; 28.24028Koördinate: 12°48′20″S 28°14′25″O / 12.80556°S 28.24028°O / -12.80556; 28.24028
Webtuiste:cbu.edu.zm

Die Koperstreek-universiteit (Engels: Copperbelt University, CBU) is een van drie openbare universiteite in Zambië[1] en het in 1987 afgestig van die Universiteit van Zambië (Unza), waarvan dit sedert 1978 'n satellietkampus was. Die instelling het in Ndola ontstaan, maar nadat dit die kampus van die Zambia Institute of Technology in Kitwe bekom het, het die instelling daarheen verskuif.

Die universiteit bestaan uit vier fakulteite, waarvan hy twee by Unza geërf het: die Skool vir Sake- en Nywerheidstudies en die Skool vir Omgewingstudies. Ná die CBU die Tegnologie-instituut in 1989 oorgeneem het, is dit in sy Skool vir Tegnologie omskep. Die Skool vir Bosbou en Houtwetenskap (later herdoop tot die Skool vir Natuurlike Hulpbronne) het in 1995 gevolg.

Meer as 80% van die studente is mans en van die 193 akademiese personeel, was in 2007 net 25 vroue. Nagraadse studente vorm 'n geringe deel van die totaal en net 12% van die personeellede het 'n doktorsgraad, terwyl die meeste (66%) 'n meestersgraad het. Die universiteit het slegs 10 artikels in geakkrediteerde tydskrifte tussen 2004 en 2007 gepubliseer en ook net twee boeke.[2]

Onlangs het die universiteit twee nuwe fakulteite ("skole") bygekry: die Skool vir Wiskunde en Natuurlike Hulpbronne, wat departemente van Biologiese Wetenskap, Chemie, Rekenaarswetenskap, Wiskunde, Fisika en Wiskunde-en-wetenskap-opvoeding insluit, asook 'n skool vir nagraadse studies, wat sodanige studie aanmoedig, koördineer en bande smee met buitelandse navorsingsinstellings.

Van die universiteit se 4 273 studente in 2007, was 3 752 voltyds op die kampus terwyl die res afstandonderrig gekry het. Die meeste kom uit Zambië. Buitelandse studente betaal in sommige gevalle tot twee keer meer om hier te studeer.[3]

Verwysings[wysig | wysig bron]

Bron[wysig | wysig bron]

Eksterne skakels[wysig | wysig bron]