Laerskool Paul Greyling
| Laerskool Paul Greyling | |
 |
|
| Leuse | Dien in geloof |
|---|---|
| Gestig | 1956 |
| Tipe | Staatskool |
| Leerlinge | 150 |
| Grade | Graad R - Gr 7 |
| Adres | Vishoek |
| Stad | Kaapstad |
| Provinsie | Wes-Kaap |
| Land | Suid-Afrika |
| Webblad | lpgskool.co.za |
Die Laerskool Paul Greyling is 'n Afrikaansmedium-laerskool in Sunrayweg in die Kaapstadse voorstad Vishoek, volgens sy webwerf "die mees suidelike Afrikaanse skool in Afrika", (hoewel Laerskool Struisbaai en Laerskool Gansbaai ook Afrikaansmedium is, maar verder suid geleë).
Die skool is in 1956 gestig ná 'n behoefte aan Afrikaanse onderrig in die Vishoek-omgewing ontstaan het. Van die stigterslede was ds. H.F.M. Louw en dr. Paul Greyling. Louw was van 13 Desember 1947 leraar van die NG gemeente Simonstad-Kalkbaai (NG gemeente Vishoek) en Greyling die laaste leraar van die afsonderlike NG gemeente Kalkbaai, voor dit in 1941 met Simonstad saamgesmelt het as Simonstad-Kalkbaai en uiteindelik NG gemeente Vishoek geword het. Hy was later algemene sekretaris van die N.G. Kerk-uitgewers, voorloper van Lux Verbi.BM.
Die eerste skoolhoof, mnr. W.J. van Wyk, beklee die pos 23 jaar lank tot sy aftrede in 1979. Hy word opgevolg deur mnre. J.R. Horne, V. Pienaar en J.A. Horn. Die huidige skoolhoof is mnr. J.A. (André) Engelbrecht. Paul Greyling was nog altyd 'n klein skool, met 'n leerdertal in 2010 van 122, maar 143 in 2011, waarvan 27 in gr. 1 en 29 in gr. 2, oftewel amper 40% van al die leerders. In 2012 was dit 135 met die grootste klas die 26 gr. 3's en die kleinste die 12 gr. 5's.
Dit is naas Laerskool Simon van der Stel in Wynberg, wat in 2010 net 179 leerders oorgehad het en in 2011 net 157 (ná die laaste graad met twee klasse (2010 se gr. 7's) hoërskool toe is), die laaste Afrikaansmedium-laerskool in die suidelike voorstede ná die sluiting in 1984 van die Laerskool Oude Molen in Pinelands en die invoer van parallelmediumonderrig (tot 2009 toe die skool "voorlopig" eentalig Engels geword het) aan die Laerskool Groote Schuur in Rondebosch en aan die Laerskool Zwaanswyk in Retreat, wat tans bekendstaan as die Zwaanswyk Akademie en wat met ingang 2011 Afrikaans as onderrigmedium in die grondslagfase afskaf. Van die oorspronklike vier Afrikaansmedium hoërskole het vroeg in die 21ste eeu nie een oorgebly nie: Hoërskool Nassau het in 1977 met Hoërskool Groote Schuur saamgesmelt, terwyl laasgenoemde, Voortrekker en Zwaanswyk almal dubbelmedium geword het of verengels het.
In die eerste nuusbrief van 2011 skryf die skoolhoof oor die vorige jaar: "Ons het onverpoosd gewerk en gebeur om teen oorweldigende huidige tendense ons skool te laat voortbestaan. In geloof het die Beheerliggaam, ouers en onderwysers alle moontlikhede ondersoek en met baie teëspoed en doodloopstrate te doen gekry, maar tog het ons nie opgegee nie. Die werk is nog nie klaar nie, reeds kan ons sien hoedat ons Hemelse Vader ons met ‘n dubbele maat geseën het."[1]
