Lake Arthur-dam
in Wikipedia, die vrye ensiklopedie
In die bolope van die Groot-Visrivier in die Oos-Kaapprovinsie is daar drie besproeiingsdamme, naamlik die Kommandodrifdam en die Lake Arthur-dam, beide in die Tarkarivier, en die Grassridgedam in die Grootbrakrivier.
Lake Arthur is in 1924 voltooi en genoem na die destydse goewerneur van die Unie van Suid-Afrika, prins Arthur van Connaught. Die dam lê 21km suidoos van Cradock. Dit het ‘n walhoogte van 38m en sy oppervlakte as dit vol is, is 887ha. Weens erge toeslikking het die dam reeds in die eerste tien jaar van sy bestaan byna die helfte van sy aanvanklike opgaarvermoeë verloor. Daarom is die damwal in 1939 verhoog. In 1950 was die dam so toegespoel dat die Kommandodrifdam stroomop gebou is.
