Leeuwarden
Leeuwarden, Fries: Ljouwert, is die hoofstad van die Nederlandse provinsie Friesland. Die munisipaliteit het sowat 94 000 inwoners (2010).
In 1435 is drie dorpe aan die Middelsee - Oldehove (Fries: Aldehou), Nijehove (Nijehou) en Hoek tot Leeuwarden saamgevoeg, wat in dieselfde jaar ook stadstatus toegeken is.
Leeuwarden spog met 'n pragtige binnestad en talle historiese geboue, wat tussen die Middeleeue en die 19de eeu ontstaan het. Besienswaardighede sluit die Grote Kerk (Jakobynekerk) uit die 15de eeu, die Oldehove-toring uit die 16de eeu, die Prinsessehof uit die 17de eeu, die Raadsaal van 1715, die Provinsiehuis (18de eeu), die Sint-Bonifatius-kerk (19de eeu), die Paleis van Justisie (1846), die Beurs (1880) en die Friesiese Letterkundige Museum (1883) in.
Die Prinsetuin is die park aan die noordkant van Leeuwarden se binnestad.
Leeuwarden beskik oor 'n professionele sokkerspan: SC Cambuur.
