Lemoenduif

in Wikipedia, die vrye ensiklopedie
Spring na: navigasie, soek
Lemoenduif
By Gaborone-wildtuin, Botswana
Bewaringstatus
Wetenskaplike klassifikasie
Koninkryk: Animalia
Filum: Chordata
Klas: Aves
Orde: Columbiformes
Familie: Columbidae
Genus: Spilopelia (sien teks)
Spesie: S. senegalensis
Binomiale naam
Spilopelia senegalensis
(Linnaeus, 1766)
Subspesies
  • S. s. aegyptiaca (Latham, 1790)
  • S. s. cambayensis (Gmelin, 1789)
  • S. s. ermanni (Bonaparte, 1856)
  • S. s. phoenicophila (Hartert, 1916)
  • S. s. senegalensis (Linnaeus, 1766)
  • S. s. sokotrae (Grant, 1914)
Sinonieme

Streptopelia senegalensis (sien teks)
Stigmatopelia senegalensis (sien teks)

Die Lemoenduif of Rooiborsduif (Streptopelia senegalensis, lengte: 22–24 cm) is 'n duif inheems aan Suid-Afrika. Hy is nie bang vir mense nie en word dikwels op stadsypaadjies, tuinpaadjies en in tuine aangetref. Sy Engelse naam Laughing dove, kom van sy sagte borrelende roepnoot wat soos iemand wat lag, klink.[2] Lemoenduiwe is algemeen regdeur Suider-Afrika en is dikwels in groot getalle in stadsparke en op oop gebiede bymekaar. Soos die Tortelduif bestaan sy vertoonvlug uit 'n byna vertikale opvlieg in die lug, en dan 'n afsweef met uitgestrekte vlerke en stert.

Voorkoms[wysig]

Die lemoenduif is een van die kleiner spesies in Suid-Afrika en kan uitgeken word aan sy gespikkelde kraag wat rondom die sykante van die nek en om die bors loop. Ander soortgelyke spesies het 'n swart kraag agter die nek, maar dié ontbreek by die lemoenduif. As die mannetjie wil hofmaak, styg hy steil in die lug op en daal dan stadig met die vlerke uitgestrek en die stert oopgesprei om die opsigtelike wit kante te vertoon.[2]

Streptopelia senegalensis' - Muséum de Toulouse

Algemeen[wysig]

Beskrywing: Hierdie spesie word van die groter Tortelduif onderskei aan die afwesigheid van 'n swart agterkraag, aan die diagnostiese swart gespikkelde halssnoer oor sy kaneelkleurige bors, en aan die kaneelkleurige rug. In vlug is die kontras tussen die blou-grys voorvlerke en en kaneelkleurige rug opvallend en die wit punt en en kante van die stert duidelik sigbaar. Wyfie is kleiner en ligkleuriger. Jong voël is valer as volw.
Habitat: Word in verskeidenheid habitats aangetref, maar vermy egte woestyn.
Status: Volop standvoël. Die algemeenste en bekenste duif in die streek wat ooral aangepas het by tuine en middestede.
Soortgelyke spesies: Tortelduif, Europese tortelduif.
Roep: Algemene roep is 'n onderskeidende stygende en dalende ‘ooo-koook-koook-kooo’.
Dieet: Hoofsaaklik saad en graan, maar ook insekte en slakke.

Broeigewoontes[wysig]

Plek: In 'n boom of struik, maar sal soms ook lysies in stede gebruik.
Nes: Lendelam stokkiesnes wat maklik uitmekaar val in erge winde of storms.
Seisoen: Enige maand van die jaar maar veral die droë seisoen.
Getal eiers: 2.
Broeitydperk: 12-16 dae.
Kuikenstaduim: Sowat 15 dae.

In die tuin[wysig]

Habitat: Soek meestal in oop gebiede soos grasperke kos, dikwels in die geselskap van Tortelduiwe en Grootringduiwe. Lemoenduiwe word gewoonlik die slagoffer van die huiskat, wie se eienaars hulle juis lok om die risiko van ander tuinvoëls wat dalk gevang kan word, te verminder.
Kosvereistes: Dié duifies vreet meestal graan, maar sal ook broodkrummels, mieliepap en ander soortgelyke kos eet. Soos by alle duiwe, kan jy wedywering met ander voëls by die voertafel verminder deur graan op die grond te strooi. Hulle is ook lief vir mielies.
Nesmaak: Soos die Tortelduif, maak die Lemoenduif in 'n wye verskeidenheid bome en struike nes, met die voorkeur aan uitheemses in die Kaap en die inheemses verder noord. Neste is tussen twee en vyf meter bo die grond.

Sien ook[wysig]

Verwysings[wysig]

  1. BirdLife International (2009) Stigmatopelia senegalensis In: IUBN 2009. IUBN Rooi Lys van Bedreigde Spesies. Weergawe 2009.2. www.iucnredlist.org Verkry op 4 Februarie 2010.
  2. 2,0 2,1 Die Suid-Afrikaanse voëlgids (4de uitgawe), John Sinclair, John Mendelsohn, 1987. P.14