Leo Marquard

Leo Marquard.

Ds. J.J.T. Marquard, Leo Marquard se vader, na wie die dorp en NG gemeente Marquard genoem is.

Leopold (Leo) Marquard (15 Junie 1897 - 27 Maart 1974) was 'n Suid-Afrikaanse opvoedkundige, skrywer en stigterslid van die Liberale Party.

Hy is op Winburg in die Vrystaat gebore waar sy vader, ds. J.J.T. Marquard – na wie die dorp Marquard genoem is – predikant was van die plaaslike NG gemeente. Marquard het sy opvoeding op sy geboortedorp en aan die Grey-kollege in Bloemfontein ontvang. Daarna hy het as Rhodes-beurshouer na Oxford vertrek.

Marquard het tydens die Eerste Wêreldoorlog in die Britse Lugmag diens gedoen. Na afloop van die oorlog het hy begin skoolhou. In 1924 was hy een van die stigters van NUSAS (Nasionale Unie van Suid-Afrikaanse Studente).

In 1940 sluit hy hom aan by die Suid-Afrikaanse magte in die Tweede Wêreldoorlog en behaal groot welslae as hoof van die Weermagopvoedingsdiens. Ná die oorlog het hy aan die hoof van Oxford University Press se bedrywighede in Suider-Afrika gestaan. Hy het ook breedvoerig geskryf oor geskiedenis, opvoeding en sosiologie.

Marquard het Suid-Afrika by Unesco (die Verenigde Nasies se organisasie vir opvoeding, wetenskap en kultuur) verteenwoordig en was 'n leidende figuur in die Suid-Afrikaanse Instituut vir Rasseverhoudinge (SA Institute of Race Relations). Op 9 Mei 1953 was hy medestigterslid van die Liberale Party.

Hy is oorlede op 27 Maart 1974.

Bronne

• Rosenthal, Eric, Encyclopaedia of Southern Africa, Juta and Company Limited, Kaapstad en Johannesburg, 1978.
• (en) Sy biografie op SAHistory.org.za. URL besoek op 21 Oktober 2015.