Lughawe
'n Lughawe is 'n groot vlak terrein met bane (vliegveld) waarop vliegtuie kan land (landingsbaan) en opstyg (stygbaan), 'n lugbeheertoring en radar; verder terminaalgeboue met kantore vir die administrasie van die lugdiens en geriewe vir passasiers. Gewoonlik bestaan die terminaalgeboue uit 'n aankomssaal met bagasie-area (bagasie-opeisgebied), 'n vertreksaal met inweeg-toonbanke, sekuriteitsbeheer, paspoort- en doeanebehere vir buitelandse vlugte, vluginligtingsborde, winkels en sale waar die reisigers vir hulle vlug kan wag. Verder beskik groot lughawens vandag oor 'n moderne infrastruktuur soos spoorweegstasies, bus- en taxistaanplekke, parkeergarages, motorhuur, poskantoor, winkelsentrums, restaurante, kafees, polisie- en brandweerstasie, hospitale ens. 'n Groot aantal van bedrywe en hulle grondpersoneel sorg vir 'n vloeiende afloop op die lughawe: spyseniers, brandstofversorging, skoonmakers, bagasievervoer, vliegtuigloodse ens.
