Lydenburg

in Wikipedia, die vrye ensiklopedie
Spring na: navigasie, soek
Lydenburg
(Mashishing)
Ligging van Lydenburg op 'n kaart (Mpumalanga)
Lydenburg
Lydenburg
Koördinate: 25°6′S 30°27′O Koördinate: 25°6′S 30°27′O
Land Vlag van Suid-Afrika Suid-Afrika
Provinsie Mpumalanga
Distriksmunisipaliteit Ehlanzeni
Plaaslike Munisipaliteit Thaba Chweu
Stigting 1849
Oppervlak
 - Dorp 26,12 km²  (10,1 vk m)
Bevolking (2001)
 - Dorp 6 858
 - Digtheid 260/km² (673,4/myl2)
Tydsone SAST (UTC+2)
Poskode 1120

Lydenburg is 'n dorp in noordelike Mpumalanga, Suid-Afrika. Lydenburg is geleë aan die Spekboom-sytak van die Olifantsrivier aan die voet van die Long Tompas. Die naam van die dorp is uit Nederlands afkomstig en beteken "Dorp van Lyding." Die dorp is in die hart van die Suid-Afrikaanse forelhengelgebied en is 'n landbou- en mynbousentrum. Lydenburg is deel van die Thaba Chweu Plaaslike Munisipaliteit wat volgens die 2001 sensus 'n bevolking van 81 236 gehad het.

Geskiedenis[wysig]

Van die vroegste bekende voorbeelde van Afrika beeldhouwerk wat terugdateer tot ongeveer 400 n.C., is in die laat 1950's in die gebied gevind. Lydenburg is in 1849 deur 'n groep Voortrekkers onder leiding van Andries Potgieter gestig nadat hulle hulle vorige vestiging by Ohrigstad in die Noorde verlaat het as gevolg van 'n malariaepidemie. Die dorp het die hoofstad van De Republiek Lydenburg in Zuid Afrika geword in 1856. Die republiek het later in 1857 by die Republiek van Utrecht aangesluit. In 1860 het beide die republieke weer aangesluit by die Zuid-Afrikaansche Republiek.

Lydenburg het in belangrikheid toegeneem omdat dit op die ossewapad na Delagoabaai (Maputo) was, wat nie onder Britse beheer was nie. In 1871 is die bou van 'n pad deur Abraham Espag op versoek van President Thomas Francois Burgers begin. Die eerste waens van Delagoabaai het in 1874 in Lydenburg aangekom.

Op 6 Februarie 1873 is goud in die omgewing ontdek en binne 3 maande is die Lydenburgse goudvelde geproklameer. Tydens die Eerste Vryheidsoorlog wat in 1880 uitgebreek het, het 'n Britse garnisoen onder Luitenant Walter Hillyar Colquhoun Long (oom van die eerste Viscount Long) beheer van Lydenburg oorgeneem om die goudvelde te beheer. Die gedoemde opmars na Pretoria deur die 94ste Regiment onder bevel van Luitenant Anstruther het in die dorp begin. Die res van die garnisoen by Lydenburg is beleer.

Teen 1910 het die spoorlyn Lydenburg bereik en in 1927 het dit 'n munisipaliteit geword.

Naamsverandering[wysig]

Daar word beplan dat die dorp herdoop gaan word na Mashishing, volgens 'n aankondiging wat op 30 Junie 2006 deur die Suid-Afrikaanse Minister van Kuns en Kultuur, Pallo Jordan, gemaak is.[1] Die naam het egter nog nie posgevat nie en padtekens en besighede (soos die "Lydenburg Museum") gebruik steeds die ou naam.

Sien ook[wysig]

Verwysings[wysig]