Lydia Lindeque

Lydia Lindeque
Lydia Lindeque toe sy hoofdame van André Huguenet se toneelgeselskap was.
Geboortenaam	Alida Lindeque
Geboorte	1912 Ficksburg
Sterfte	1997
Nasionaliteit	Suid-Afrika
Beroep(e)	Sangeres en aktrise
Internet-rolprentdatabasis-profiel

Lydia Lindeque (1912-1997) was een van die pioniers van die Afrikaanse toneelkuns onder Paul de Groot en André Huguenet. Sy was met onder andere Uys Krige getroud. Sy het twee kinders, Eulalia en Tai, gehad.

Lindeque is in 1912 op Ficksburg gebore as Alida Lindeque. Sy wou eerder toneelspeel as skoolgaan en op 14-jarige ouderdom het sy aan Paul de Groot geskryf. Hy het haar genooi om by sy toneelgeselskap aan te sluit en sy het dadelik die hoofrol gekry in Die Rosekrans, sonder enige toneelopleiding. De Groot het aan Alida haar verhoognaam, Lydia, gegee.

Lydia Lindeque

Hy was verlief op die jong Vrystaatse nooi, maar die romanse het nie gevlot nie. In 1937 het sy en Uys Krige stilletjies voor die magistraat getrou terwyl sy opgetree het in 'n stuk met die naam Die Gevaarlike Huwelik.

Lindeque se outobiografie, Trek op die skerm!, het in 1941 verskyn. Tydens die Tweede Wêreldoorlog het sy, Siegfried Mynhardt en ’n klompie ander akteurs in Noord-Afrika opvoerings vir Suid-Afrikaanse soldate gehou.

Haar eerste Engelse rol was as Viola in Twelfth Night. In die vyftigerjare het sy die titelrol van Yerma (ook in Engels) vir die Cape Town Theatre Productions gespeel. Krige was so begeester deur die sukses van die Engelse opvoering dat hy Yerma vertaal het. Dit is 1952 in drie aflewerings in die literêre tydskrif Standpunte gepubliseer. Toe dit in 1963 in boekvorm verskyn, het Krige dit opgedra "Aan Lydia Lindeque wie se Yerma ek nooit sal vergeet nie".

In 1958 is Lindeque en Krige geskei en sy het daarna met John Mantel, 'n sakeman, getrou. Hulle het in Andorra, tussen Frankryk en Spanje, gewoon.