Mabalingwe-natuurreservaat

in Wikipedia, die vrye ensiklopedie
(Aangestuur vanaf Mabalingwe-wildreservaat)
Mabalingwe-natuurreservaat
Land Suid-Afrika
Provinsie Limpopo
Naaste dorp Bela Bela
Ligging van Mabalingwe-natuurreservaat op 'n kaart (Suid-Afrika)
Mabalingwe-natuurreservaat
Mabalingwe-natuurreservaat
Koördinate: 24°50′26″S 28°2′53″O / 24.84056°S 28.04806°O / -24.84056; 28.04806Koördinate: 24°50′26″S 28°2′53″O / 24.84056°S 28.04806°O / -24.84056; 28.04806
Oppervlak 12 000 ha
Openingsjaar 1988
Bestuursliggaam Mabalingwe Natuurreservaat
Webblad http://www.mabalingwe.co.za
Ingangshek na die Mabalingwe-natuurreservaat.
Swembad onder die W.P. Wessels-dam, een van verskeie in die reservaat.
'n Geelpooteekhorinkie in die Mabalingwe-natuurreservaat.

Mabalingwe is 'n privaat natuurreservaat in die Limpopoprovinsie van Suid-Afrika. Die reservaat beslaan 'n gebied van 12 000 ha en is 38 km wes van die dorp Bela Bela. Dit is 'n maklik-bereikbare reservaat in 'n malariavrye gebied van die Transvaalse Bosveld, ongeveer 1½ uur se ry vanaf Johannesburg.

Mabalingwe beteken "kolle van die luiperd". Die naam is afgelei van die woorde “mabala ya ingwe” – “mabala” beteken “kolle” in Tswana en “ingwe” is Zoeloe vir “luiperd”.

Geskiedenis[wysig | wysig bron]

Mabalingwe was oorspronklik 'n mielie- en wildplaas van 2 141 ha, genaamd Boschpoort, wat in 1972 deur die Wessels-familie begin is. Aanvanklik was daar slegs koedoes en rooibokke op die plaas.

In 1987 besluit Basie Wessels om Boschpoort in 'n vakansieoord te ontwikkel. Die eerste 10 boshutte (chalets) is in 1988 voltooi. In 1989 is seekoeie, renosters en swartwitpense op die plaas gevestig.

Teen 1994 was daar reeds 105 voltooide eenhede. Gedeeltes van die plaas is aan alleeneienaars vir die bou van privaathuise verkoop. Die plaas is ook in dié tyd deur die aankoop van die aangrensende Gorcum-land vergroot.

In 1994 keer Basie se seun, Hannes Wessels, 'n argitek van beroep, terug na die plaas om die karavaanpark te ontwikkel. In dieselfde jaar word Olievenfontein aangekoop en by die ontwikkeling gevoeg. Olifante wat in die Krugerwildtuin uitgedun sou word, is in 1995 na Mabalingwe verskuif. In 1999 is daar met die teling van siektevrye buffels in Hoedspruit in die Limpopoprovinsie begin, waarna van dié buffels in Mabalingwe gevestig is.

Die Itaga-kamp is in 2000 geopen en twee nuwe ontwikkelings, naamlik Boekenhoutplaat en Elandsfontein is van stapel gestuur. In 2003 is Cyferfontein ontwikkel. Teen dié tyd was die plaas ongeveer 12 500 ha groot.

Basie Wessels, Mabalingwe se eerste eienaar, is in April 2008 in 'n tragiese vliegtuigongeluk op die reservaat oorlede nadat sy girokopter neergestort het.[1]

Vandag is Mabalingwe 'n gewilde en internasionaal bekende natuurreservaat.[2]

Wildsoorte[wysig | wysig bron]

Wildverskeidenheid sluit die Groot vyf in: leeus, luiperds, buffels, olifante en renosters; en ook seekoeie, kameelperde, hiënas, vlakvarke en swartwitpense is 'n paar van die 36 spesies soogdiere in die wildreservaat. Vir liefhebbers van die geveerdes, is daar meer as 220 voëlspesies om te besigtig.

Daar is gewilde wildritte in oop viertrekvoertuie, konferensiegeriewe, 'n groot restaurant, kroeg en swembaddens.

Huisvesting[wysig | wysig bron]

Die reservaat verskaf verskillende soorte tyddeelbehuising in grasbedekte chalets, sommige wat naby die hoofkompleks is, asook 'n paar kampe dieper in die reservaat, wat meer privaatheid en rustigheid skep.

  • Die hoofkompleks het 34 grasdakchalets elk met 'n eie badkamer.
  • Ingwe (luiperdkamp) langs die hoofkompleks
  • Kubu (seekoeikamp)
  • Phiri (hiënakamp), verste in die bos
  • Kwalata (swartwitpenskamp)

Geriewe[wysig | wysig bron]

Mabalingwe beskik oor die volgende geriewe:

  • Karavaanpark
  • Verskeie warm en koue swembaddens
  • Tennis- en muurbalbane
  • Minigholfbaan (putt-putt)
  • Plaaswinkel
  • Restaurant en dameskroeg met uitsig oor damme
  • Opklimpunt vir wild- en leeukampritte

Verwysings[wysig | wysig bron]

  1. Twee beseer nadat vliegtuig val Geargiveer 28 Februarie 2015 op Wayback Machine, Beeld, 17 September 2013
  2. Mabalingwe se webtuiste Geargiveer 21 Februarie 2015 op Wayback Machine, besoek op 28 Februarie 2021