Mamelodi 10

in Wikipedia, die vrye ensiklopedie

Die Mamelodi 10 (of Nietverdiend 10) was 'n groep jeugdiges wat c. 26/28 Junie 1986 ontvoer is deur 'n polisieman en sg. askari, Joe Mamasela, voor hulle deur die Suid-Afrikaanse spesiale magte vermoor is. Die lotgevalle van die tien het tydens die verrigtinge van die Waarheids-en-Versoeningskommissie bekend geword.

Konstabel Joe Mamasela van die veiligheidspolisie het homself as 'n werwer vir Umkhonto we Sizwe voorgedoen, en voorgeneem om die tien met 'n minibus na Botswana te neem vir militêre opleiding. Mamasela het hulle egter by Nietverdiend afgelaai, waar veiligheidsamptenare die tien gevangegeneem het. Hier is hulle deur kommandant Dave Trippet met 'n chemiese middel ingespuit. Die bewustelose groep is weer in die minibus gelaai en na Bophuthatswana geneem. Daar het spesiale taakmaglid Diederick Jacobus Vorster 'n kleefmyn en AK-47 in die minibus geplaas, en die voertuig aan die brand gesteek. Die byna onherkenbaar verbrande liggame is saam begrawe in 'n veld naby Winterveld, Pretoria.[1]

Jack Cronje, Jaques Hechter, Paul van Vuuren, Wouter Mentz en Roelf Venter het oor hierdie dade getuig voor die Waarheids-en-Versoeningskommissie, en amnestie daarvoor ontvang. Mamasela het 'n artikel 204 getuie geword en sy rol in die moorde erken, wat aan hom vrywaring besorg het solank sy getuienis toereikend was. Taakmaglid D.J. Vorster het getuig dat hy na die moorde vir ontslag van sodanige missies gevra het, weens die veiligheidsrisiko's daaraan en omdat hy dit nie met sy pligte as soldaat kon vereenselwig nie.[1]

Name van die tien[wysig | wysig bron]

  • Rooibaard Geldenhuys (1969-07-22 – 1986-06-28)
  • Morris Kabini
  • Jeremiah Magagula
  • Stephen Makena
  • Abraham Makolane
  • Samuel Masilele (1970-12-18 – 1986-06-28)
  • Jeremiah Zondi Ntuli (1969-05-03 – 1986-06-28) (of Matthews P. Lerutla)[2]
  • Thomas Phiri (1964-08-20 – 1986-06-28)
  • Elliot Sathekge (1968-05-23 – 1986-06-28)
  • Sipho Phillip Sibanyoni (1968-03-07 – 1986-06-28)[3]

Verwysings[wysig | wysig bron]

  1. 1,0 1,1 Baker, K.A. "History of South Africa: Apartheid South Africa" (in Japannees). southafrica.to. Geargiveer vanaf die oorspronklike op 24 Oktober 2017. Besoek op 11 April 2011.
  2. Georgette, Madelaine. "Nietverdiend Ten" (in Engels). Studio Georgette. Geargiveer vanaf die oorspronklike op 5 Maart 2016. Besoek op 11 April 2011.
  3. Keppler, Virginia (7 April 2011). "Hulde aan helde wat rus, Adjunkminister sit krans op tereggestelde MK-lid se graf". Beeld. p. 12.

Sien ook[wysig | wysig bron]