Margaret Ballinger

in Wikipedia, die vrye ensiklopedie
Spring na: navigasie, soek
Margaret Ballinger, eerste president van die Liberale Party.

Margaret Livingstone Ballinger (11 Januarie 1894 - 1980) was 'n kragtige en invloedryke spreker, voorstander van gelykheid in Suid-Afrika en stigterslid van die Liberale Party.

Sy is gebore as Margaret Hodgson op 11 Januarie 1894 in Glasgow, Skotland. Ballinger kom op 10-jarige leeftyd na Suid-Afrika en studeer aan die Hugenote Kollege op Wellington. Daarna neem verdere studies haar na die Rhodes-universiteitskollege in Grahamstad en Somerville College, Oxford.

Sy het 'n paar jaar lank geskiedenis gedoseer aan die Universiteit van die Witwatersrand, waarna sy in 1937 tot die Parlement verkies is as verteenwoordiger van swartes. Sy het dié posisie behou tot en met die afskaffing van swart verteenwoordiging in 1960.

Ballinger was op 9 Mei 1953 in Kaapstad saam met vername Engelssprekende intellektuele soos Alan Paton medestigter van die Liberale Party toe hulle die Verenigde Party verlaat het weens sy gebrek aan 'n duidelike beleid ten opsigte van die rassevraagstuk. Sy was ook die party se eerste president met Paton en Leo Marquard as mede-adjunkpresidente. Die party het gelyke regte vir alle Suid-Afrikaners gegrond op volwaardige burgerskap voorgestaan. Ballinger het die party verlaat voor sy ontbinding in 1968, toe die lede besluit het om eerder te ontbind as om toe te gee aan wetgewing van daardie jaar (die Wet op die Verbod op Politieke Inmenging) wat daarop gemik was om politieke partye se lede tot net een rassegroep te beperk.

Bronne[wysig]

  • Rosenthal, Eric, Encyclopaedia of Southern Africa, Juta and Company Limited, Kaapstad en Johannesburg, 1978.