Media-Saturn
Die Media-Saturn-Holding GmbH (MSH) is die grootste Europese winkelketting vir elektroniese verbruikersware [1] waarin twee oorspronklik selfstandige winkelkettings en huidige handelsmerke, Media Markt en Saturn (vroeër Saturn-Hansa), saamgesmelt is. Vir die publiek tree Media Markt en Saturn nogtans as mededingers op. Die maatskappy maak deel uit van die aandelemaatskappy Metro AG. Media-Saturn se hoofkwartier is in die Beierse stad Ingolstadt geleë.
Die maatskappy word deur sy desentrale struktuur gekenmerk - sy winkels is in regtelike opsig selfstandige ondernemings waarin die Media-Saturn Holding 'n meerderheid aandele hou. Die plaaslike bestuurders beskik oor 'n minderheid aandele van sowat tien persent. Hulle het 'n beperkte invloed op die aanbod, pryse, personeelbestuur en advertensies van hul handelswinkels.
Die Media-Saturn-Holding het in die afgelope dekades sterk groei getoon en tot die beduidendste handelsmaatskappy vir elektroniese verbruikersware in Europa ontwikkel. Tans is daar 770 Media Markt- en Saturn-winkels in altesaam 16 lande wat in 2008 'n totale omset van 19 miljard € gegenereer het.[2] Die groep het tans sowat 60 000 medewerkers, waarvan 2 000 in die hoofkwartier in Ingolstadt.
