Medininkai

in Wikipedia, die vrye ensiklopedie
Spring na: navigasie, soek
Die Rooms-Katolieke kerk van Medininkai

Medininkai (Pools Miedniki Królewskie) is 'n dorp en munisipaliteit in Litaue wat sowat 25 kilometer suidoos van die hoofstad Vilnius langs die ou pad na Minsk en digby die grens met Wit-Rusland geleë is. Die dorp en munisipaliteit (Litaus seniūnija) het respektiewelik 500 en 1 500 inwoners. Die ekonomies aktiewe bevolking is oorwegend in die landbousektor werksaam.

Die twee hoogste bergspitse van Litaue, Aukštasis kalnas (293,84 meter) en Juozapinės kalnas ("Josefsberg", 293,60 meter) is albei in die munisipaliteit geleë.

Geskiedenis[wysig]

Medininkai is tydens die Napoleontiese Oorloë in 1812 deur Franse troepe aan die brand gesteek en was daarna 'n onbeduidende nedersettings. Die dorp het in 1991 internasionale bekendheid verwerf nadat Russiese eenhede tydens Litaue se stryd om onafhanklikheid ses van sewe Litause grenswagters by die plaaslike grenspos vermoor het.[1]

Taal en godsdiens[wysig]

Tans is sowat 95 persent van Medininkai se bevolking van Poolse afkoms. Naas Litause Pools word in die dorp ook Wit-Russies, Litaus en Russies gebesig. Sowat 98 persent van die inwoners is aanhangers van die Rooms-Katolieke Kerk. Die plaaslike Rooms-Katolieke kerk, wat van hout gebou is, beskik ook oor 'n klein klooster.

Besienswaardighede[wysig]

Die bouvalle van die kasteel Medininkai, 'n vesting wat uit die tydperk van die oorloë tussen Litaue en die Duitse Orde dateer, is naby die dorp geleë. Dit is een van min Litause vestings wat uit stene en teëls gebou is.

Verwysings[wysig]

  1. Günther Schäfer: Litauen. Bielefeld: Peter Rump 2009, bl. 202