Modem

in Wikipedia, die vrye ensiklopedie
Spring na: navigasie, soek

'n Modem is 'n toestel wat 'n analoë draersein moduleer om digitale inligting te enkodeer en demoduleer so 'n draersein om die versende data te ontsyfer. Die doel hiervan is om 'n sein te produseer wat maklik versend en ontsyfer kan word om weer die oorspronklike data te verkry. Modems kan gebruik word in vele toepassings waar analoë seine ingespan word om data te versend en wissel van aangedrewe diodes tot radio. Eksperimente is al selfs uitgevoer met die gebruik van modems tussen twee blikke wat met 'n draad verbind is! Die mees algemene voorbeeld van 'n modem skakel die ene en nulle van 'n persoonlike rekenaar om na klanke wat dan oor telefoonlyne versend word en wanneer dit aan die ander kant ontvang word, word die inligting dan weer na ene en nulle omgeskakel. Modems word oor die algemeen geklassifiseer volgens die hoeveelheid data wat hulle in 'n gegewe tydperk kan oordra en word normaalweg is bisse per sekonde of "bps" gemeet.

Veel meer eksotiese modems word deesdae daagliks deur internetgebruikers ingespan, veral die kabelmodems en ADSL modems. In telekommunikasie word "radiomodems" gebruik om herhaalde datarame teen baie hoë tempo oor mikrogolfradioverbindings te versend. Sommige mikrogolfmodems versend meer as 'n honderd miljoen bisse per sekonde. Optiese modems kan data oor optiese vesels versend. Die meeste interkontinentale dataverbindings gebruik deesdae optiese modems wat data deur ondersese optiese veselkabels versend. Optiese modems het dikwels dataversendingstempos wat 'n biljoen (1x109) bisse per sekonde oorskry.