Montmartre

in Wikipedia, die vrye ensiklopedie
Spring na: navigasie, soek
Die trappe van Montmartre
Montmartre word oorheers deur die wit katedraal Sacré Cœur
Die wingerd van Montmartre
Skilders op die plein Place du Tertre

Montmartre (Frans: [mɔ̃'maʁtʁ]) is 'n heuwel in die noorde van Parys wat sy naam ook aan die vroeëre dorp, wat teen sy hellings geleë was, verleen het. Nadat dié dorp saam met twee ander nedersettings, La Chapelle en Clignancourt, in 1860 by Parys ingelyf is, dra ook die 18de Paryse arrondissement of stadsdistrik aan die Seine se regteroewer dié naam.

Montmartre is op 130 meter bo seevlak die hoogste punt in die Franse hoofstad en van veraf sigbaar, veral danksy die wit katedraal Sacré Cœur wat bo-op die heuwel opgerig is. Besoekers kan Montmartre se beroemde trappe tot bo-op die berg klim of op die kabelkar, die Funiculaire de Montmartre, na bo ry.

In die 19de eeu het Montmartre die brandpunt van Parys se literetêre en kunslewe en 'n gewilde bestemming vir uitstappies geword. Hier was die ateljees van bekende kunstenaars geleë, waaronder Salvador Dalí, Amedeo Modigliani, Claude Monet, Piet Mondriaan, Pablo Picasso en Vincent van Gogh. In 2001 het die Franse regisseur Jean-Pierre Jeunet sy rolprent Le Fabuleux Destin d'Amélie Poulain hier geskiet en nuwe belangstelling vir Montmartre by inheemses en toeriste gewek. Hulle word onder meer deur Montmartre se naglewe met talle nagklubs gelok.

Vandag verkoop plaaslike kunstenaars steeds hul werke op die plein Place du Tertre, alhoewel die styging in huurgeld hul lewenssituasie bemoeilik. 'n Kunstenaarskring rondom Maurice His het in 1983 ook die wingerde van die Commanderie du Clos Montmartre teen 'n heuwelhelling aangelê wat 'n wyn met hoë suur oplewer. Met 500 liter bly die oes, wat jaarliks ingehaal word, egter beskeie.