Mosselbaai

Mosselbaai Mossel Bay (Aliwal-Suid)
Mosselbaai
Mosselbaai
Koördinate: 34°11′″S 22°8′″O
Land	Suid-Afrika
Provinsie	Wes-Kaap
Distriksmunisipaliteit	Eden
Plaaslike Munisipaliteit	Mosselbaai
Bevolking
- Stad	150 000
Tydsone	Suid-Afrikaanse Standaardtyd (UTC+2)

Mosselbaai is 'n dorp in die provinsie Wes-Kaap (Suid-Afrika) met 150 000 inwoners (2009). Dit is oos van die Kaap die Goeie Hoop en wes van George. Die N2 nasionale pad gaan as 'n snelweg verby die dorp. Santosstrand is as 'n blouvlagstrand gesertifiseer.

Geskiedenis

Die Portugese seevaarder Bartolomeu Dias sit hier op 3 Februarie 1488 voet aan wal en lewer sodoende die bewys dat Afrika 'n suidelike punt het wat dit moontlik maak om van Europa na Indië te seil. Diaz noem die baai oorspronklik Aguada de São Bras.

Die huidige naam van die dorp en sy baai gaan terug op die Nederlandse seevaarder Paulus van Caerden, wat die gebied in 1601 besoek - dit is 'n verwysing na die groot aantal mossels wat hy in die baai gesien het. Die dorp was in 1848 gestig as Mosselbaai. Dit is ook vir 'n rukkie in geskiedenis Aliwal-Suid genoem. In 1852 het die destydse goewerneur, Sir Harry Smith dit probeer vernoem na die veldslag by Aliwal in Indië, waar die Britte 'n geveg teen die Sikhs gewen het. Die nuwe naam het egter nooit inslag gevind nie en dit is gou weer Mosselbaai genoem.

Infrastruktuur

Die spoorlyn vanaf Kaapstad het Mosselbaai in 1905 bereik. Die spoorlyne vanaf Bloemfontein en Port Elizabeth het twee jaar later gevolg. Mosselbaai beskik ook oor die sewende grootste hawe in Suid-Afrika. Die breekwater en kaai is in 1912 gebou. Die hawe is steeds in gebruik; klein vaartuie verskeep nog produkte soos graan, ingelegde vrugte en groente, oker en aalwynsap van hier.

Distrik

Die distrik is 1 900km² groot. Gemengde boerdery word beoefen met produkte soos koring, wol, melk, patats en ander groente en vrugte.

Mossgas

Die Mossgasprojek behels die wêreld se tweede olie-uit-gas aanleg. Dit aanleg is ontwerp om vir 30jaar lank 25 000vate petrol en diesel per dag te lewer uit gasvelde wat in 1985 85km suidwes van Moselbaai ontdek is. Die platform is met 24 heipale geanker en is 220m hoog. Produksie het in 1991 by die Mossref se raffinadery op land begin. Die projek was omstrede aangesien die ekonomiese lewensvatbaarheid bevraagteken was.

Skeepswrakke

• 9 Junie 1752: Die Deense skip Kroonprinses van Denemarke:

Sien ook

• Lys van dorpe in Suid-Afrika
• Spookplekke in Suid-Afrika

Bron

• Op Pad in Suid-Afrika. BPJ Erasmus. 1995. ISBN 1-86842-026-4

Eksterne skakels

• Mosselbaai Munisipaliteit
• Mosselbaai Toerisme Buro