Mount Washington, New Hampshire
| Mount Washington | |
|---|---|
 Mount Washington, soos gesien vanuit Bretton Woods | |
| Ligging | New Hampshire, Verenigde State |
| Hoogte | 1 917 meter bo seevlak |
| Reeks | Presidential-bergreeks |
| Koördinate | 44°16′14.98″N 71°18′12.54″W / 44.2708278°N 71.3034833°WKoördinate: 44°16′14.98″N 71°18′12.54″W / 44.2708278°N 71.3034833°W |
| Eerste bestyging | 1642 |
| Maklikste roete | Staptoer/tandradbaan (winter) NH Roete 16 (somer) |
Mount Washington is die hoogste bergpiek in die Noordoostelike Verenigde State op 'n hoogte van 1 917 meter bo seevlak. Die berg staan bekend vir sy uiters wisselvallige weerstoestande en hou die rekord vir die hoogste windsnelheid wat ooit buite 'n orkaan op die aardoppervlak aangeteken is: Die namiddag van 12 April 1934 het die windsnelheid 'n maksimum van 231 myl of 372 kilometer per uur bereik.[1][2]
Die Eerste Nasies het na die berg as Agiocochook of "Tuiste van die Groot Gees" verwys.[2]
Mount Washington lê in die Presidential-bergreeks van New Hampshire se White Mountains in die Coos-distrik. Dit is die derde hoogste bergpiek in die oostelike Verenigde State ná Mount Mitchell in Noord-Carolina op 2 037 meter bo seevlak en Clingmans Dome in Tennessee op 2 025 meter – en volgens sy relatiewe hoogte in topografiese opsig selfs die hoogste bergpiek in die Amerikaanse ooste.
Die grootste deel van Mount Washington is in die White Mountain National Forest geleë, alhoewel 'n gebied van 0,24 vierkante kilometer, wat die kruin en sy onmiddellike omgewing insluit, deel uitmaak van die Mount Washington State Park.
Geskiedenis[wysig | wysig bron]
.jpg)
Darby Field het in 1642 daarop aanspraak gemaak dat hy die eerste mens was wat die berg se kruin bereik het. Tot by die middel van die 19de eeu, toe dit as een van die eerste toeristebestemmings in die land ontwikkel is, was daar min aktiwiteite in sy omgewing.
As deel van die toerismeprojek is voetslaanpaaie en 'n aantal berghotelle gebou, waaronder Tip Top House wat tot vandag toe bewaar gebly het en as 'n nasionale uitstallingsruimte herstel is.
Ander 19de eeuse aktiwiteite het die bou van 'n koetspad (tans die Mount Washington Auto Road) en die Mount Washington-tandratbaan (1869) ingesluit wat albei nog steeds in gebruik is.
Die U.S. Signal Service, 'n voorloper van die huidige Amerikaanse Weather Bureau, het in die tydperk tussen 1870 en 1892 die eerste weerkundige waarnemingstasie op Mount Washington se kruin onderhou. Die stasie was die eerste van sy soort wêreldwyd en het as voorbeeld vir ander lande gedien.
Weer[wysig | wysig bron]
Mount Washington word deur uiters wisselvallige weerstoestande gekenmerk, onder meer vanweë verskeie stormbane wat hulle oorsprong in die Suid-Atlantiese Oseaan, die Golf van Mexiko en die Noordwestelike Gebiede van die Stille Oseaan het en hier sameloop. Aangesien die Presidential-bergreeks vertikaal uit die lae omgewing rys en in noord-suidelike rigting loop, is Mount Washington 'n massiewe natuurlike versperring vir westelike winde.
Laedrukstelsels begin vanweë die relatiewe temperatuurverskille tussen die Noordoostelike VSA en die Atlantiese Oseaan veral in die wintermaande langs die kuslyn ontwikkel en dra uiteindelik saam met die bogenoemde faktore by tot Mount Washington se kenmerkende weerstoestande. Windsnelhede op die berg oortref dié van 'n orkaan op 'n gemiddelde 110 dae per jaar. Tussen November en April waai sterk winde tydens twee derdes van 'n dag.
Verwysings[wysig | wysig bron]
- ↑ Mount Washington Observatory
- ↑ 2,0 2,1 "www.mountwashington.com: Die kruin van Mt. Washington". Geargiveer vanaf die oorspronklike op 11 Oktober 2007. Besoek op 21 Januarie 2008.
Normdata  |
|
|---|