N11 (Suid-Afrika)
| N11 Nasionale Pad |
|---|
.svg)
Die N11 is een van Suid-Afrika se 17 nasionale paaie. Hierdie nasionale pad gaan deur drie provinsies: KwaZulu-Natal, Mpumalanga en Limpopo. Daar is baie besienswaardighede op die roete.[1] Dit verbind die N3, KwaZulu-Natal met die Groblersbrug grenspos op die grens met Botswana.
Inhoud |
[wysig] KwaZulu Natal
Die N11 begin in KwaZulu Natal waar dit aftak van die N3 nasionale pad 15km suid van die Tugela tolhek in 'n oostelike rigting. Na 19km gaan die pad deur Ladysmith en swaai dan noordoos. Die N11 gaan dan verby die Elandslaagte slagveld, verby Biggarsberg en Fort Mistake en na 57km word die afdraai van die R68 hoofpad bereik. Die R68 gaan na Glencoe en Dundee. Na 'n verdere 64km word die afdraai van die R34 hoofpad bereik nadat daar eers verby die Ntshingwayodam en die afdraai na Newcastle gery is. Die pad na Volksrust is 40km noord. Daar word op die pad deur die Laingsnekpas gery, dan verby die berg en slagveld van Majuba en deur Charlestown gery. Volksrust is in Mpumalanga.
[wysig] Mpumalanga
Van Volksrust hou die pad steeds noord vir 41km tot by Amersfoort. Ermelo is 59km verder noord. Ongeveer 35km voor Ermelo word die Vaalrivier gekruis. By Ermelo word die N17 nasionale pad gekruis terwyl die N2 nasionale pad ook hier begin. Die N11 swaai nou noordwes en 50km verder is Hendrina. Die N4 nasionale pad word 43km verder gekruis en na nog 9km word Middelburg teëgekom. Groblersdal is 92km verder; halfpad word verby die Loskopdam gery en Limpopo binne gegaan.
[wysig] Limpopo
Dit is 27km van Groblersdal na Marble Hall. Dit is dan nog 51km tot by Roedtan nadat die Elandsrivier gekruis is. Die N1 nasionale pad is 37km verder. Na die N1 kruising is dit 12km tot by Mokopane (Potgietersrus). Die N11 hou steeds noordwes en na 92km word daar verby Uitzicht gery waar die Steenbokskeerkring gekruis word. Baltimore is 37km verder. Die grenspos by Groblersbrug is 60km verder nadat eers by twee nedersettings Marnitz en Tom Burke verby gery is. By die grenspos eindig die N11.[2][3][4]
[wysig] Verwysings
- ^ http://www.routes.co.za/route/nindex.html
- ^ Op Pad in Suid-Afrika. 1995. BPJ Erasmus. ISBN 1-86842-026-4
- ^ Padlangs deur Suid-Afrika. 2010. ISBN 978-1-77007-751-5
- ^ http://www.shellgeostar.co.za/roadassistance.asp?road=n11
[wysig] Sien ook
Nasionale paaie in Suid-Afrika
|
|||||||||
