NG gemeente Keurboom

Die gemeente se kerkterrein behoort nou aan die Claremont-baptistekerk. Die kerkgebou is in die verste deel van die foto en die kerksaal in die naaste.

Ds. WP de Vos, eerste leraar van Keurboom, omstreeks 1951 afgeneem toe hy leraar van die destydse Gatooma was.

Die NG gemeente Keurboom was 'n gemeente van die Nederduitse Gereformeerde Kerk in die Kaapstadse voorstad Claremont wat in 1968 van die NG gemeente Rondebosch afgestig het en sowat 22 jaar later weer by die moedergemeente ingelyf is.

Agtergrond

Die gemeente se ontstaan kan teruggevoer word tot amper 30 jaar voor sy afstigting toe daar tydens die dienstyd van ds. P. de V. Grobbelaar van Rondebosch 'n kerksaal in Claremont gebou is waar daar gereeld dienste gehou is.

Keurboom se eerste leraar, wat van die moedergemeente af oorgekom het, was ds. Willem Petrus de Vos, vader van die TV-persoonlikheid Eon de Vos. Laasgenoemde was in sy matriekjaar hoofseun van die plaaslike Hoërskool Groote Schuur. Ds. De Vos verlaat Keurboom in 1975 toe hy op 21 Junie leraar van die NG gemeente Rietfontein-Noord in Pretoria word.

Latere leraars

Van 1975 tot 1977 is ds. Petrus Albertus Pretorius die leraar. Ds. Hennie Winterbach, die gemeente se langs dienende predikant, dien as leraar van 1977 tot hy sy emeritaat op 16 April 1989 aanvaar. Sy dogter, Veranza, was koorleidster eers van die skoolkore van die Laerskool Groote Schuur, wat in 1983 die afdeling vir laerskoolkore op die Roodepoortse Internasionale Eisteddfod gewen het, en toe van dié van die Hoërskool Groote Schuur. Ds. Winterbach se opvolger op 20 Julie 1989 was ds. Johannes Petrus Theron, wat hierheen gekom het van die aanliggende NG gemeente Wynberg-Militêr, waar hy 'n kapelaan van die destydse SAW was. Hy word later aktuarius van Wes-en-Suid-Kaapland se sinode en lid van die Algemene Taakspan Regte.

Inlywing

Toe die gemeente in 1990 weer by Rondebosch ingelyf is, word ds. Theron medeleraar van daardie gemeente, waar hy bly tot 1995 toe die krimpende lidmaattal 'n tweede leraarspos onmoontlik maak. Hy bedien daarna eers Montagu en van 2001 af Helderberg op Somerset-Wes.

Keurboom was nooit 'n groot gemeente nie met die ldimaattal wat gewoonlik gewissel het tussen 400 en 500. Die lidmate het mettertyd afgeneem tot daar in 1989 'n klein opflikkering kom met die inlywing van die grootste gedeelte (lidmate wat in Rondebosch-Oos gewoon het) van die NG gemeente Die Vlakte (sowat 40 lidmate wat in Sybrandpark woonagtig was, het by Rondebosch ingeskakel en 'n aantal by die NG gemeente Van Riebeeck in Kenwyn.)

Die afname het egter voortgeduur tot Keurboom nie meer sinvol op sy eie kon bestaan nie en by Rondebosch ingelyf is. Die kerkgebou op die hoek van St. Michael- en Cookweg, Claremont, is aan die Baptistekerk se gemeente Claremont verkoop vir R750 000.

Leraars

• Willem Petrus de Vos, 1968 - 1975 (eerste leraar, van Rondebosch gekom)
• Petrus Albertus Pretorius, 1975 - 1977
• Hennie Winterbach, 1977 - 1989
• Johannes Petrus Theron, 1989 - 1990 (laaste leraar, na Rondebosch gegaan)

Bronne

• Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.
• Gaum, dr. Frits (red.), Jaarboek van die Nederduitse Gereformeerde Kerke 1990, Pretoria: Tydskriftemaatskappy van die Nederduitse Gereformeerde Kerk, 1989.